Tuesday, 7 June 2016

47.எத்திசை யுமம ரர்பணிந் தேத்தும்

47.எத்திசை யுமம ரர்பணிந் தேத்தும் 
பாடல் :47
எத்திசை யுமம ரர்பணிந் தேத்தும்
இருடீகே சன்வலி செய்ய
முத்தன்ன வெண்முறு வற்செய்ய வாயும்
முலையு மழகழிந் தேன்நான்
கொத்தலர் காவில் மணித்தடம் கண்படை
கொள்ளு மிளங்குயி லேஎன்
தத்துவ னைவரக் கூகிற்றி யாகில்
தலையல்லால் கைம்மாறி லேனே

விளக்கம் : 
எத்திசையும் அமரர் பணிந்து ஏத்தும் - எல்லா திசைகளிலும் வானவர்கள் வணங்கும்
இருடீகேசன் வலி செய்ய - ரிஷிகேஷன்  எனக்குக் காட்சி தராமல் என் மனம் வலிக்கச் செய்கிறான்
முத்தன்ன வெண்முறுவல் செய்ய வாயும் - முத்துப் போன்ற வெண்மையான பற்களோடு அழகாக முறுவல் செய்த என் வாயும்
முலையும் அழகு அழிந்தேன் நான் - என் முலைகளும் அழகு அழிந்தேன் நான்
கொத்து அலர் காவில் மணித்தடம் கண்படை - கொத்துக் கொத்தாக மலர்கள் கொண்ட சோலையிலே அழகிய இடம் தன்னில் உறக்கம்
கொள்ளும் இளங்குயிலே - கொள்ளும் இளங்குயிலே
என் தத்துவனை வரக் கூகிற்றி ஆகில் - என் தத்துவனை வரக் கூவுவாய் எனில்
 தலையல்லால் கைம்மாறிலேனே -  காலமெல்லாம் என் தலையை உன் பாதத்தில் வைத்து வணங்குவேன்..இதைத் தவிர வேறு கைம்மாறு எதுவும் அறிந்திலேன்

எல்லா திசைகளிலும் வானவர்கள் பணிந்து வணங்கும் (ரிஷிகேஷன் )  திருமால் எனக்குக் காட்சி தராமல் எனை வந்து சேராமல் என் மனத்தை வலிக்கச் செய்கிறான்..முத்துப் போன்ற வெண்மையான அழகாக புன்முறுவல் செய்த என் வாயும் , என் மார்புகளும் அவனைக் காணாத ஏக்கத்தினால் வந்த வேதனையில் அழகிழந்து போயின. சிரிப்பை மறந்தாள் இந்தப் பாவை. ஆகவே வாய் அழகு இழந்தது. எவனுக்காகப் படைக்கப்பட்டதோ இந்த முலைகள் அவன் தொடாமல் போனதால் பாழாகிப் போயின


பூங்கொத்துக்கள் நிறைந்த சோலையில் அழகியதோர் இடத்தினில் உறக்கம் கொள்ளும் இளங்குயிலே ..என் இறைவனை,  எனைச் சேர வரக் கூவுவாய் எனில் காலம் முழுதும் உன் பாதங்களில் என் தலை வைத்து நன்றியாய் இருப்பதைத் தவிர வேறு கைம்மாறு நான் அறியேன் ..
கோதையின் பாடல்கள் படிக்கப் படிக்க ,அவளுக்காகவே சில பாடல்கள் திரையில் வந்ததாகவே மனத்திற்குப்படுகிறது .

 ராசாவே உன்ன காணாத நெஞ்சு காத்தாடி போலாடுது
பொழுதாகிப் போச்சு விளக்கேத்தியாச்சு பொன் மானே உன்னத் தேடுது
ஸ்ரீராமனோட பூமாலை போட வைதேகி உள்ளம் வாடுது 
மங்கை ஒரு கங்கை என மன்னன் ஒரு கண்ணன் என காதில் ஒரு காதல் கதை சொன்னால் என்ன 
அத்தை மகனோ மாமன் மகனோ சொந்தம் எதுவோ பந்தம் எதுவோ 
சந்தித்ததும் சிந்தித்ததும் தித்திட 
அம்மாடி நீதான் இல்லாத நானும் 
வெண்மேகம் வந்து நீந்தாத வானம் 
தாங்காத ஏக்கம் போதும் போதும்..






Monday, 6 June 2016

46.மென்னடை யன்னம் பரந்துவிளையாடும்

46.மென்னடை யன்னம் பரந்துவிளையாடும் 
பாடல் :46
மென்னடை யன்னம் பரந்துவிளையாடும்
வில்லிபுத் தூருறை வான்றன்
பொன்னடி காண்பதோ ராசையி னாலென்
பொருகயற் கண்ணிணை துஞ்சா
இன்னடி சிலோடு பாலமு தூட்டி
எடுத்தவென் கோலக் கிளியை
உன்னொடு தோழமை கொள்வன் குயிலே!
உலகளந் தான்வரக் கூவாய்!

விளக்கம் :
மென் நடை அன்னம் பரந்து விளையாடும் - மெல்ல நடக்கும் அன்னம் எல்லா இடங்களிலும் பரந்து விளையாடும்
வில்லி புத்தூர் உறை வான் தன் - வில்லி புத்தூரில் உறைந்துள்ளவன் தன்
பொன்னடி காண்பதோர் ஆசையினால் - பொற்பாதங்கள் காணும் ஓர் ஆசையினால்
என் பொரு கயல் கண்ணினை துஞ்சா - என் மீன் போன்ற கண்கள் தூங்கவில்லை
இன்னடிசிலோடு பால் அமுதூட்டி - இனிமையான அடிசிலோடு (அக்கார அடிசில் ) பால் அமுதும் ஊட்டி
எடுத்த என் கோலக் கிளியை - வளர்த்த என் கோலக் கிளியை
உன்னொடு தோழமை கொள்வன் குயிலே ! - உன்னோடு நட்பாக ஆக்குகிறேன் குயிலே
உலகளந்தான் வரக் கூவாய் ! - உலகளந்தான் வரக் கூவுவாயாக !

மெல்ல மென்மையாக நடக்கும் அன்னம் எல்லா இடங்களிலும் பரந்து (பரவலாக ) விளையாடும் ,  வில்லிபுத்தூரில் உறைந்து இருப்பவன்தன் பொன் திருவடி காண்பதோர் ஆசையினால் , என் மீனை ஒத்த கண்கள் சண்டையிட்டுக் கொண்டு தூங்கவில்லை..இனிமையான அடிசிலோடு (அக்கார அடிசில் எனும் பதார்த்தம்..நெய்யால் செய்யப்படுவது ) பால் அமுதும் ஊட்டி எடுத்து நான் வளர்த்த என் கோலக் கிளியை உன்னோடு தோழமை ஆக்குகிறேன் குயிலே ! உலகளந்தான் வரக் கூவுவாயாக !


ஓவியம் -கேசவ் 
குயிலிடம் கொஞ்சுகிறாள்..என் கிளியை எல்லாம் உனக்கு தோழி ஆக்குகிறேனே அந்த உலகளந்தான் என் உடலையும்  அளக்க வரக் கூவுவாயாக !
எனக்கு இதைச் செய்தா நான் உனக்கு இதைத் தாரேன் என ஆசை காட்டுவது உலக இயல்பு..கோதையும் அதைத்தான் குயிலிடம் சொல்கிறாள் :) 

Friday, 3 June 2016

45.என்புரு கியின வேல்நெடுங் கண்கள்

45.என்புரு கியின வேல்நெடுங் கண்கள் 
பாடல் :45
என்புரு கியின வேல்நெடுங் கண்கள்
இமைபொருந் தாபல நாளும்
துன்பக் கடல்புக்கு வைகுந்த னென்பதோர்
தோணி பெறாதுழல் கின்றேன்
அன்புடை யாரைப் பிரிவுறு நோயது
நீயு மறிதி குயிலே
பொன்புரை மேனிக் கருளக் கொடியுடைப்
புண்ணிய னைவரக் கூவாய்

விளக்கம் : 
என்பு உருகியின - என் எலும்புகள் உருகின
வேல் நெடுங் கண்கள் இமை பொருந்தா பல நாளும் - வேலினை ஒத்த நீண்ட என் கண்கள்  இமை மூடவில்லை.
 பல நாளும் துன்பக் கடல் புக்கு - பல நாட்களாகவே துன்பம் எனும் பெருங்கடலில் மூழ்கிக் கொண்டிருக்கிறேன்
வைகுந்தன் என்பதோர் தோணி பெறாது உழல்கின்றேன் - வைகுந்தன் என்பவனே எனக்கு அந்தக் கடலில் இருந்து மீட்கும் தோணியாக வர முடியும். அந்தத் தோணியைப் பெறமாட்டாமல் உழல்கின்றேன்
அன்புடையாரைப் பிரிவுறும் நோய் அது - அன்புக்கு உரியவர்களைப் பிரிந்து வாடும் நோய் பற்றி
நீயும் அறிதி குயிலே - நீயும் அறிந்திருப்பாய் தானே குயிலே!
பொன்புரை மேனிக் கருளக் கொடியுடைப் - பொன்னை ஒத்த மேனி கொண்ட     , கருடனின் கொடி உடைய


புண்ணியனை வரக் கூவுவாய் ! - புண்ணியனை வரக் கூவுவாயாக !

(தோணி -படகு )
என்னவன் வர மாட்டானா என ஏங்கி ஏங்கிப் பசலை நோய் பீடித்து,  என் எலும்புகள் உருகிப் போயின..வேலினை ஒத்த நீண்ட எனது கண்கள் தன் இமைகளை ஒருக்கணமும் மூடவில்லை தூக்கம் பிடிக்காமல்.. பல நாட்களாகவே துன்பம் என்னும் பெருங்கடலில் மூழ்கிக் கொண்டிருக்கின்றேன். அந்தக் கடலில் இருந்து என்னைக் காப்பாற்றும் சக்தி கொண்ட தோணி வைகுந்தன் என்பவனே..அந்த வைகுந்தனைக் காணாமல் வேதனையில் உழன்று கொண்டிருக்கின்றேன்.. அன்புக்கு உரியவரைப் பிரிந்து வாடும் நோயைப் பற்றி நீயும் அறிந்திருப்பாய் தானே குயிலே !




தங்கம் தேங்கிப் போனது போன்ற மேனியை உடையவன் , கருடனின் கொடி கொண்ட புண்ணியனை எனைத் தேடி வரச்சொல்லி கூவுவாயாக !

கண்ணா உனைத் தேடுகிறேன் வா...
காதல் குயில் பாடுகிறேன் வா..
உன்னோடுதான் வாழ்க்கை
உள்ளே ஒரு வேட்கை..
காதல் என்னும் தீரவில்லை..கண்ணீர் இன்னும் ஓயவில்லை..
ஏன் இந்தக் காதல் என்ற எண்ணம் தடை போடுமா..
என் பாடல் கேட்ட பின்பும் இன்னும் பிடிவாதமா..
என்ன நான் சொல்வது இன்று வந்த சோதனை
மௌனமே கொல்வதால் தாங்கவில்லை வேதனை
உன்னைத் தேடி வந்தேன் உண்மை சொல்ல வேண்டும்..
நான் இந்தச் சோகம் கொள்ள நீ தான் காரணம்
ஆண்டாளுக்காகவே ஜானகி  திரையில்பாடி வச்சிருக்காங்க.. (கடைசி வரி மட்டும் நான் மாத்திட்டேன் :) )
ஆண்டாளுக்காக இந்தப் பாடலை இளையராஜா சார்பாக சமர்ப்பணம் செய்வோம் .எங்க சுத்தினாலும் மனசு இறுதியாக ராஜாவிடமே அடைக்கலம் புகுகின்றது ..நம் எல்லா உணர்வுகளுக்கும் அவர் இசையில் ஆறுதல் இருப்பதால்..

Thursday, 2 June 2016

44.மாதலி தேர்முன்பு கோல்கொள்ள மாயன்

44.மாதலி தேர்முன்பு கோல்கொள்ள மாயன்
பாடல் 44
மாதலி தேர்முன்பு கோல்கொள்ள மாயன்
இராவணன் மேல் சரமாரி
தாய்தலை யற்றற்று வீழத் தொடுத்த
தலைவன் வரவெங்குங் காணேன்
போதலர் காவில் புதுமணம் நாறப்
பொறிவண்டின் காமரங் கேட்டுஉன்
காதலி யோடுடன் வாழ்குயி லே!என்
 கருமாணிக் கம்வரக் கூவாய்

விளக்கம் : 
 மாதலி தேர் முன்பு கோல் கொள்ள - மாதலி என்பவன் இராமனுக்காக முன்புறமாகத் தேரோட்ட
மாயன் இராவணன் மேல் சரமாரி - மாயம் செய்யும் இராவணன் மீது சரமாரி (விடாமல் அடிப்பது )
தாய் தலை அற்று அற்று வீழத் தொடுத்த - பத்துத்தலை இராவணன் ஒவ்வொரு தலையாக அறுந்து அறுந்து வீழ விடாமல் தொடுத்த
தலைவன் வர எங்கும் காணேன் - என் தலைவன் வர எங்கும் காணேன்..அவர் வரப் பார்க்கலையே
போது அலர்  காவில் புதுமணம் நாற  -  மலரும் பருவத்தில் உள்ள மலர்கள் உள்ள சோலையிலே புதுமணம் கமழ
பொறி வண்டின் காமரம் கேட்டு - உடம்பில் புள்ளிகள் கொண்ட வண்டின் இசைப்பாடல் கேட்டு
உன் காதலியோடு உடன் வாழ் குயிலே !- உன் காதலியுடன் வாழ்கின்ற குயிலே
என் கருமாணிக்கம் வரக் கூவாய் ! -  என் கருநிற மாணிக்கம் வரக் கூவுவாயாக !

மாதலி என்பவன் இந்திரனின் தேரோட்டி..ஆனால் இந்திரன் போரிட்டதே இல்லை..புறமுதுகிட்டு ஓடுபவன்..ஆனால் மாதலி இராமனுக்காக தேரோட்டியாக வந்த பொழுது பின்பக்கமாக ஓடவில்லை..கம்பீரமாக முன்புறம் தேரோட்டினான்.. அதனால்தான் "முன்பு " என்ற சொல்லைப் பயன்படுத்துகிறாள்.. மாயம் செய்யும் இராவணன் மீது சரமாரியாக (அசராமல் அடிப்பது ) அம்பு மழை பொழிய ,  இராவணனது பத்துத் தலை ஒவ்வொன்றாக அறுந்து அறுந்து வீழ வைத்த என் தலைவன் ,   எனைத் தேடி வர எங்கும் காணேன்..தவிப்போடு சொல்கின்றாள்..அவர் வரக் காங்கலையே..



மலரும் பருவத்தில் உள்ள மலர்கள் புதிதாய்ப் பூத்து மணம் கமழும் சோலையில் , புள்ளி வண்டின் இசைப்பாடல் கேட்டு தன் காதலியோடு மகிழ்வோடு வாழும் குயிலே! நீ உன் துணையோடு இருக்கிறாய் அல்லவா..எனக்கும் துணை வேண்டும் ..என் கருமை நிற மாணிக்கம் எனைத் தேடி வரக் கூவுவாயாக !
Image result for பொறிவண்டு


இந்தப் பேதையின் தவிப்பும் வேதனையும் மனதின் அடி ஆழம் வரை எனைத் தாக்குகிறது ..அன்பின் கோதையே..உனை ஆற்றுப்படுத்த உம் தலைவன் விரைவில் வருவான் !

Monday, 30 May 2016

43.வெள்ளை விளிசங் கிடங்கையிற்

43.வெள்ளை விளிசங் கிடங்கையிற்
பாடல் :43
வெள்ளை விளிசங் கிடங்கையிற்
கொண்ட விமல னெனக்குருக் காட்டான்
உள்ளம் புகுந்தென்னை நைவித்து நாளும்
உயிர்பெய்து கூத்தாட்டுக் காணும்
கள்ளவிழ் செண்பகப் பூமலர் கோதிக்
களித்திசை பாடுங் குயிலே
மெள்ள விருந்து மிழற்றி
மிழற்றாதென் வேங்கட வன்வரக் கூவாய்

விளக்கம் : 
வெள்ளை விளி சங்கு இடக்கையில் கொண்ட -வெண்மையான சங்கை இடக்கையில் கொண்ட
விமலன் எனக்கு உருக் காட்டான் - விமலன் எனக்கு அவன் உருவத்தைக் காட்ட மாட்டான்
உள்ளம் புகுந்து என்னை நைவித்து நாளும் - என் உள்ளத்தில் புகுந்து என்னை வருத்தி நாள்தோறும்
உயிர் பெய்து கூட்டாட்டுக் காணும் - என்  உயிர் வதைத்து கூத்தாடுவதைக் காண்பான்
கள் அவிழ் செண்பகப்பூ மலர் கோதிக் - கள் (தேன் ) சுரக்கும் செண்பகப்பூ மலர் கோதி
களித்து இசை பாடும் குயிலே - இன்புற்று இசை பாடும் குயிலே
மெள்ள விருந்து மிழற்றி - மெதுவாக இருந்து மழலை மொழி பேசி என் அருகே இருந்து எனை வதைக்காமல்
மிழற்றாது என் வேங்கடவன் வரக் கூவாய் - என் வேங்கடவன் வரக் கூவுவாயாக!
வெள்ளை விளி சங்கு.. விளி என்பது அழைத்தல்..சங்கின் மூலமாக அழைப்பது..விளிக்கப் பயன்படும் சங்கு..வெண்மையான விளி சங்கை இடக்கையில் ஏந்தியவன் விமலன் (பெருமாள் ) எனக்கு அவன் உருவத்தைக் காட்ட மாட்டான்.. இவள் படும் துயரம் கண்டு நேரிலே தோன்றி அவள் காதல் நோய் போக்க மாட்டான். என் மனத்தினுள் புகுந்து , என்னை வருத்தி நாள்தோறும் (EVERYDAY) என் உயிர் இதனால் வதைபடுவதை இப்படிக் கூத்தாடுவதை ரசித்துக் கொண்டிருக்கின்றான்..



கள் சுரக்கும்..பொதுவாக பூக்களில் தேன் சுரக்கும்..அதைத்தான் கோதை குறிப்பிடுகிறாள்..கள் சுரக்கும் செண்பகப்பூ மலர் கோதி ..கோதுதல் என்பது ஓர் அழகான சொல்..வலிக்காமல் தொடுவது சுகமாய்த் தொடுவது..தொட்டு அளைவது :) அப்படி கோதி அதிலே இன்புற்று இசை பாடும் குயிலே!



மெள்ள ..மெல்ல இவ்விரண்டுக்கும் என்ன பொருள்..?
மெல்ல - மென்மையாக..(soft ) மெள்ள - மெதுவாக (slow )
மிழற்றுதல் - குயில் பேசும் மொழி
அதன் ஓசை இப்படி இருக்கிறதாம்..இப்படி மெதுவாக இங்கே மிழற்றிக் கொண்டிருக்கிறாய்..இங்கே மிழற்றாது (இங்க என்ன பேச்சு? என் வேங்கடவனிடம் செல் ) என் வேங்கடவன் முன் சென்று என்னை வந்து சேரச் சொல்லிக் கூவுவாயாக !
கண்ணன் மீதான காதலால் தன் உயிர்படும் வேதனையைக் குயிலிடம் சொல்லி ஆற்றுப்படுத்திக் கொள்கிறாள் கோதை :) 

Thursday, 26 May 2016

42.மன்னு பெரும்புகழ் மாதவன்

42.மன்னு பெரும்புகழ் மாதவன்

நாச்சியார் ஐந்தாம்பத்து இனிதே ஆரம்பம் :) மன்மதனை வேண்டியாயிற்று. சிற்றில் சிதைக்காதே என்று கரம் கூப்பி கெஞ்சி ஆயிற்று. ஆய்ச்சியரோடு குருந்த மரத்தின் இடைக் கூறை வைத்து விளையாடாதே என்று கண்டித்தாயிற்று. தான் கண்ணனுடன் சேர்வோமா என்று கூடல் விளையாட்டில் குறி கேட்டாயிற்று..அடுத்து குயில் விடு தூது..ஏதோ மரத்தின் ஊடே தனியே கூவும் குயிலின் குரலில் மென்சோகம் எதுவும் இழையோடக் கண்டாள் போல இந்த கோதை..தன்னைப் போலவே அதற்கும் காதல் நோய் பீடித்து இருக்கக்கூடும் என்று தன் மனம் உணர்ந்து அது தூது சொல்லக் கூடும் என்று குயிலிடம் தூது விடுகிறாள் இப்பேதை..
காதல் வியாதி பொல்லாதது..
அது கண்ணும் காதும் இல்லாதது :)

பாடல் :42
மன்னு பெரும்புகழ் மாதவன் 
மாமணி வண்ணன் மணிமுடி மைந்தன்
தன்னை உகந்தது காரண மாகஎன் 
சங்கிழக் கும்வழக் குண்டே
புன்னை குருக்கத்தி ஞாழல் செருந்திப் 
பொதும்பினில் வாழும் குயிலே
பன்னியெப் போது மிருந்து 
விரைந்தென் பவளவா யன்வரக் கூவாய்

விளக்கம் :
மன்னு பெரும்புகழ் மாதவன்  - நிலைத்த பெரும்புகழுடைய மாதவன் 

மாமணி வண்ணன் மணிமுடி மைந்தன்  தன்னை -  பெருமை கொண்ட மணி வண்ணன் விலைமதிப்பற்ற கற்கள் பதித்த கிரீடம் அணிந்தவனை 
உகந்தது காரணமாக - நான் விரும்பியது காரணமாக
என் சங்கிழக்கும் வழக்குண்டே - என் வளையல்களை இழக்கும் வழக்கு உண்டா ?இது நியாயமா ?
புன்னை குருக்கத்தி ஞாழல் செருந்தி -புன்னை ,குருக்கத்தி,கோங்கு ,செருந்தி போன்ற பல மரங்கள் இருக்கும்
பொதும்பினில் வாழும் குயிலே  - சோலையினில் வாழும் குயிலே
பன்னி எப்போதும் இருந்து - இரவும் பகலும் விடாமல் இருந்து
விரைந்து என் பவளவாயன் வரக் கூவாய் - பவளத்தைப் போன்ற சிவந்த இதழ்களைக் கொண்ட வாயன் சீக்கிரம் வந்து என்னைச் சேர கூவுவாயாக!

நீடித்து நிற்கும் புகழுடைய மாதவன் , பெரும் பெருமை கொண்ட மணி வண்ணன் , மணிமுடி தரித்த மைந்தன் தன்னை , நான் விரும்பிய ஒரே காரணத்திற்காக என் சங்கு வளையல்களை இழப்பது நியாயமா இது வழக்கில் (நடைமுறையில் எங்கேனும் கண்டதுண்டா ) ( அக்காலத்தில் சங்கிலே செய்த வளையல்களை அணியும் பழக்கம் பெண்களுக்கு இருந்தது..) அடுக்குமா ? (எதனால் வளையல்களை இழக்கிறாளாம் ..பின்னே தன் தலைவனை நினைந்து நினைந்து உருகுகையில் அவன் சேராத வேதனையில் உடல் மெலிகிறது..மெலிந்த மேனியில் இருந்த வளையல்கள் தாமே கழன்று விழுகின்றன ) புன்னை,  குருக்கத்தி,  கோங்கு , செருந்தி போன்ற பல மரங்கள் இருக்கின்ற சோலையில் வாழும் குயிலே , இரவும் பகலும் விடாமல் எப்போதுமே இருந்து ,எனக்காக , பவளத்தைப் போன்ற சிவந்த இதழ்களை உடையவன் எனை வந்து சேரக் கூவுவாயாக !

வளையல்களை இழப்பதாக கோதை சொன்னதும் நினைவுக்கு வந்த திரைப்பாடல்..இந்த வரிகளும் சங்க இலக்கியங்களில் இருந்து கையாண்டது தான் :)


அன்பு நாதனே அணிந்த மோதிரம் வளையலாகவே துரும்பென இளைத்தேன் 
அந்த மோதிரம் ஒட்டியாணமாய் ஆகுமுன்னரே அன்பே அழைத்தேன்..

Tuesday, 17 May 2016

41.ஊடல் கூடலுணர்தல் புணர்தலை

ஊடல் கூட லுணர்தல் புணர்தலை
பாடல் :41
ஊடல் கூட லுணர்தல் புணர்தலை
நீடு நின்ற நிறைபுக ழாய்ச்சியர்
கூட லைக்குழற் கோதைமுன் கூறிய
பாடல் பத்தும்வல் லார்க்கில்லை பாவமே

விளக்கம் :

ஊடல் கூடல் உணர்தல் -கண்ணனுடனான ஊடலும் அதன்பின்னான கூடலும் ஊடல் கூடல் இன்பத்தை  உணர்தலும்
புணர்தலை -  இவை யாவற்றையும் உணர்ந்தபின்  புணர்தலும்
நீடு நின்ற நிறைபுகழ் ஆய்ச்சியர் - நெடுங்காலம் நிலைத்து நின்ற நிறைந்த புகழுடைய ஆய்ச்சியர்
கூடலைக் குழற் கோதை முன் கூறிய -  சோழி உருட்டி ஆடும் கூடல் விளையாட்டை  அழகிய குழல் (கூந்தல் ) உடைய கோதை கூறிய
பாடல் பத்தும் வல்லார்க்கு இல்லை பாவமே -  இந்த பத்துப் பாடல்களையும் பாடும் வல்லவர்க்கு இல்லை பாவமே

முதலில் ஊடல் (செல்லச் சண்டைகள் ) பிறகு சமாதானமாகி கூடல்..இவ்விரண்டு இன்பத்தையும் உணர்தல்..உணர்ந்த பின் புணர்தல்
பிரியாமல் , நெடுங்காலம் நிலைத்து,  கண்ணனோடு நின்ற ஆய்ச்சியர்
சோழி உருட்டி விளையாடும் இந்தக் கூடல் விளையாட்டை , அழகிய கூந்தல் கொண்ட கோதை முன் கூறியவர்கள்  .. ,  கூடல் விளையாட்டை வைத்து கோதை பாடிய இந்த பத்துப் பாடல்களையும் பாடும் வல்லமை பெற்றவர்களுக்கு இல்லை பாவமே..

தான் நினைத்த காதலனை கை கூடுவோமா என்று குறி கேட்டலும் கூடல் விளையாட்டு விளையாடும் போது தன் மனம் கொண்ட மணாளன் வருவானா எனச் சொல்லிச் சொல்லிக் கேட்டதும் கோதையின் மன வேட்கையைத் தெரிவிக்கின்றது.. அவர் வருவாரா ..அவர் வருவாரா.. என்று சோழியிடம் கேட்கிறாள் கோதை..

நாச்சியார் திருமொழி நான்காம் பத்து இனிதே நிறைவுற்றது :)