Showing posts with label நாச்சியார் திருமொழி - 4. Show all posts
Showing posts with label நாச்சியார் திருமொழி - 4. Show all posts

Tuesday, 17 May 2016

41.ஊடல் கூடலுணர்தல் புணர்தலை

ஊடல் கூட லுணர்தல் புணர்தலை
பாடல் :41
ஊடல் கூட லுணர்தல் புணர்தலை
நீடு நின்ற நிறைபுக ழாய்ச்சியர்
கூட லைக்குழற் கோதைமுன் கூறிய
பாடல் பத்தும்வல் லார்க்கில்லை பாவமே

விளக்கம் :

ஊடல் கூடல் உணர்தல் -கண்ணனுடனான ஊடலும் அதன்பின்னான கூடலும் ஊடல் கூடல் இன்பத்தை  உணர்தலும்
புணர்தலை -  இவை யாவற்றையும் உணர்ந்தபின்  புணர்தலும்
நீடு நின்ற நிறைபுகழ் ஆய்ச்சியர் - நெடுங்காலம் நிலைத்து நின்ற நிறைந்த புகழுடைய ஆய்ச்சியர்
கூடலைக் குழற் கோதை முன் கூறிய -  சோழி உருட்டி ஆடும் கூடல் விளையாட்டை  அழகிய குழல் (கூந்தல் ) உடைய கோதை கூறிய
பாடல் பத்தும் வல்லார்க்கு இல்லை பாவமே -  இந்த பத்துப் பாடல்களையும் பாடும் வல்லவர்க்கு இல்லை பாவமே

முதலில் ஊடல் (செல்லச் சண்டைகள் ) பிறகு சமாதானமாகி கூடல்..இவ்விரண்டு இன்பத்தையும் உணர்தல்..உணர்ந்த பின் புணர்தல்
பிரியாமல் , நெடுங்காலம் நிலைத்து,  கண்ணனோடு நின்ற ஆய்ச்சியர்
சோழி உருட்டி விளையாடும் இந்தக் கூடல் விளையாட்டை , அழகிய கூந்தல் கொண்ட கோதை முன் கூறியவர்கள்  .. ,  கூடல் விளையாட்டை வைத்து கோதை பாடிய இந்த பத்துப் பாடல்களையும் பாடும் வல்லமை பெற்றவர்களுக்கு இல்லை பாவமே..

தான் நினைத்த காதலனை கை கூடுவோமா என்று குறி கேட்டலும் கூடல் விளையாட்டு விளையாடும் போது தன் மனம் கொண்ட மணாளன் வருவானா எனச் சொல்லிச் சொல்லிக் கேட்டதும் கோதையின் மன வேட்கையைத் தெரிவிக்கின்றது.. அவர் வருவாரா ..அவர் வருவாரா.. என்று சோழியிடம் கேட்கிறாள் கோதை..

நாச்சியார் திருமொழி நான்காம் பத்து இனிதே நிறைவுற்றது :) 

Monday, 16 May 2016

40.பழகு நான்மறை யின்பொரு ளாய்மதம்

பழகு நான்மறை யின்பொரு ளாய்மதம்
பாடல் : 40
பழகு நான்மறை யின்பொரு ளாய்மதம்
ஒழுகு வாரண முய்ய வளித்தஎம்
அழக னாரணி யாய்ச்சியர் சிந்தையுள்
குழக னார்வரில் கூடிடு கூடலே
விளக்கம் :
 பழகு நான்மறையின் பொருளாய் - எல்லாருடைய பழக்கத்திலும் இருக்கும்  நான்கு வேதங்களின் உட்பொருளானவன்
மதம் ஒழுகு வாரணம் உய்ய அளித்த எம் அழகனார்  - மத நீர் ஒழுகும் யானையை வேதனையில் இருந்து உய்வித்தவன் (துன்பம் நீக்கியவன் ) எம் அழகனார்
 அணி ஆய்ச்சியர் சிந்தையுள் -  அழகு மிக்க ஆய்ச்சியர் சிந்தனையுள்
குழகனார் வரில் கூடிடு கூடலே ! - கலந்து குழைந்தவன் வருவார் எனில் கூடிடு கூடலே !

எல்லாருடைய பழக்கத்திலும் இருக்கும் நான்கு வேதங்களின் ஓம் என்ற பிரணவத்தின் உட்பொருளானவன் , மத நீர் ஒழுகிய யானையை அதன் வேதனையில் இருந்து துன்பம் நீக்கியவன்


எம் அழகனார் , அழகு மிக்க ஆய்ச்சியர் சிந்தனையுள் கலந்து குழைந்து இரங்குபவன் (இரங்குதல் - இரக்கம் கொண்டு அருளுதல் ) இளமையானவன் அழகானவன் எனைத் தேடி வருவார் எனில் கூடிடு கூடலே !



கொஞ்சம் செல்லமா அழகனார் குழகனார் என்பது அழகாக இருக்குல்ல :)

Saturday, 7 May 2016

39.கொண்ட கோலக் குறளுரு வாய்ச்சென்று

கொண்ட கோலக் குறளுரு வாய்ச்சென்று
பாடல் :39
கொண்ட கோலக் குறளுரு வாய்ச்சென்று
பண்டு மாவலி தன்பெரு வேள்வியில்
அண்ட மும்நில னும்அடி யொன்றினால்
கொண்ட வன்வரில் கூடிடு கூடலே

விளக்கம் :

கொண்ட கோலக் குறள் உருவாய்ச் சென்று  -  சிறியவனாக குள்ளனாக  உருவெடுத்து
பண்டு மாவலி தன்  பெரு வேள்வியில்- பண்டைய காலத்தில்  மாவலியின் பெரு வேள்வியில்
அண்டமும் நிலனும் அடி ஒன்றினால் கொண்டவன் - இந்த அண்டம் முழுவதும் ,நிலத்தையும் ஒன்றச் செய்து  தனதாக்கிக் கொண்டவன்
 வரில் கூடிடு கூடலே ! - வருவார் எனில் கூடிடு கூடலே !

உயரத்தில் சிறியவனாக குள்ளனாக உருவெடுத்துச் சென்று ,பண்டைய (முந்தைய ) காலத்தில் மாவலி என்ற மன்னனின் பெரு வேள்வியில் , இந்த அண்டமும் நிலனும் அடி ஒன்றினால் (எண் ஒன்று அல்ல இரண்டையும் ஒன்றச் செய்தல் ) ஒன்றச் செய்து தனதாக்கிக் கொண்டவன் என்னைக் கூட வருவார் எனில் நீ கூடிடு கூடலே !
Add caption

மாவலியின் அகங்காரத்தை அடக்கிய உலகளந்த பெருமாள் என்னைக் கூட வருவார் எனில் நீ கூடிடு கூடலே எனக் குறி கேட்கிறாள் கோதை.எம்பெருமான் ஓங்கி மிதிச்சா ஒன்றரை  டன் வெயிட்டுடா என்கிறாள் கோதை :)

Friday, 29 April 2016

38.ஆவ லன்புட யார்தம் மனத்தன்றி

ஆவ லன்புட யார்தம் மனத்தன்றி
பாடல் : 38
ஆவ லன்புட யார்தம் மனத்தன்றி
மேவ லன்விரை சூழ்துவ ராபதிக்
காவ லன்கன்று மேய்த்து விளையாடும்
கோவ லன்வரில் கூடிடு கூடலே

விளக்கம் :
ஆவலும் அன்பும் உடையார்தம் மனத்தன்றி - ஆவலும் அன்பும் உடையவர்களின் மனத்திலன்றி
மேவலன் - மேவு செய்யாதவன் (வேறெங்கும் இல்லாதவன்)
விரை சூழ் துவராபதிக் காவலன் - நறுமணம் சூழ்ந்த துவரா பதிக்  காவலன்
கன்று மேய்த்து விளையாடும் கோவலன் - கன்று மேய்த்து விளையாடும் ஆயர் குலத் தலைவன்
வரில் கூடிடு கூடலே ! - வருவார் எனில் கூடிடு கூடலே

தன் மீது ஆவலும் அன்பும் உடையவர்களின் மனத்தில் அன்றி மேவு அலன் .. அடியவர் மனமே கடவுளின் இருப்பிடம் என்கிறாள் கோதை. அங்கு தவிர வேறெங்கும் இருக்க மாட்டாராம்..மனமே முருகனின் மயில் வாகனம் என்ற பாடல் ஏனோ நினைவுக்கு வருகின்றது :) தூணிலும் இருப்பான் துரும்பிலும் இருப்பான் என்றான் பிரகலாதன்..கோதையோ மனமார  நேசிக்கும் மனத்தில் (மனதில் என்பதில்லை மனத்தில் என்றுதான் சொல்கிறாள்..மனத்திற்கு இனியான் என்று திருப்பாவையிலும் குறிப்பிடுவாள் ) தான் கடவுள் இருக்கிறார். நறுமணம் சூழ்ந்த துவாரகையின் தலைவன் ,காவலன் ,கன்று மேய்த்து விளையாடும் கோவலன் (மாட்டுச் சந்தையின் தலைவன் )



என்னைத் தேடி வந்து கூடி விடுவார் எனில்,  நீ கூடிடு கூடலே என்கிறாள் கோதை..

Thursday, 21 April 2016

37.அன்றின் னாதன செய்சிசு பாலனும்

37.அன்றின் னாதன செய்சிசு பாலனும்
பாடல் :37
அன்றின் னாதன செய்சிசு பாலனும்
நின்ற நீள்மரு தும்மெரு தும்புள்ளும்
வென்றி வேல்விறற் கஞ்சனும் வீழமுன்
கொன்ற வன்வரில் கூடிடு கூடலே
விளக்கம் :
அன்று இன்னாதன செய்த சிசுபாலனும் - அன்று செய்யத் தகாத செயல்களைச் செய்த சிசுபாலனும்
நின்ற நீள் மருதும் எருதும் புள்ளும் -  மருத மர வடிவில்  வழிமறித்து நின்ற நளகுபாரன் மாணிக்ரீவனும் எருது வடிவில் நின்ற அரிஷ்டாசுரனும்  கொக்கு வடிவ பகாசுரனும்
வென்றி வேல் கஞ்சனும் வீழ -  கண்ணனின் , வெற்றி தரும் வேலால்  கஞ்சனும் வீழ
முன் கொன்றவன் - இவர்கள் யாவரையும் முற்காலத்தில் கொன்றவன்
வரில் கூடிடு கூடலே ! - வருவார் எனில் நீ கூடிடு கூடலே!

மாபெரும் அவையில்  கிருஷ்ணரை  சாதிப் பெயர் சொல்லித் திட்டியவன் சிசுபாலன்.. தன்னை இகழ்ந்த சிசுபாலனை நூறு பிழைகள் பொறுத்துப் பின் வதம் செய்தார்  கிருஷ்ணர் .

அடுத்து வரும் நீள் மருது முந்தைய 36 வது பாடலில் சொல்லப்பட்ட நளகுபாரன் &மாணிக்ரீவன் .. மருத மரங்களாக சாபம் பெற்றவர்கள் ,  கிருஷ்ணரால் முறிக்கப்பட்டு சாப விமோசனம் அடைந்தனர்.

 அடுத்து கோதை சொல்லும் எருது வடிவில் வந்த அரிஷ்டாசுரன் .ஒரு கிராமத்தை வெகுவாகத் துன்புருத்திய அரிஷ்டாசுரனை கிருஷ்ணர் வதம் செய்தார்.


அடுத்தது கொக்கு வடிவில் வந்த பகாசுரன்..(புள்ளின் வாய் கீண்டானை என்று திருப்பாவையில் சொல்லுவாள் )


வெற்றி வேலால் கஞ்சனையும் வீழ வைத்தவன் இந்த கண்ணன். இவர்கள் அனைவரையும் முற்காலத்திலே கொன்றவன்,  என்னைக் கூட வருவார் எனில் கூடிடு கூடலே எனக் குறி கேட்கிறாள் கோதை










Friday, 15 April 2016

36.அற்றவன்மருதம் முறியநடை

36.அற்ற வன்மரு தம்முறி யநடை

பாடல் :36
அற்ற வன்மரு தம்முறி யநடை
கற்ற வன்கஞ் சனைவஞ் சனையினால்
செற்ற வன்திக ழும்மது ரைப்பதி
கொற்ற வன்வரில் கூடிடு கூடலே

விளக்கம் :
அற்றவன் மருதம் - அற்ற வன்மருதம் (மென் பட்டைகள் அற்ற வல்லமை மிக்க மருத
முறிய நடை கற்றவன் - மரங்கள் முறிய நடை கற்றவன்
கஞ்சனை வஞ்சனையினால் செற்றவன் - தன் மாமன் கம்சனை வஞ்சனையினால் திறமையுடன் வென்றவன்
திகழும் மதுரைப் பதி கொற்றவன் -   திகழும் வட மதுரை அரசன்
வரில் கூடிடு கூடலே!- எனை வந்து சேருவார் எனில் கூடிடு கூடலே !


அற்றவன்...என்ன அற்றவனோ என யோசித்தேன் :) ஆடைகளைத் திருடியவன் என்பதால் மூன்றாம் திருமொழியில் 29ஆம் பாடலில் மசிமையீலி ன்னு சொல்றாளே அது போலவோ ?:) இல்லை இதற்குப் பின்னால் வேறு கதை இருக்கிறதாம் விசாரித்து அறிந்தேன் . அற்றவன் எனச் சொல்லாமல் அற்ற ,வன்மருதம் அதாவது மென்மையான மரப்பட்டைகள் இல்லாமல் வலிமைமிக்க கடினமான மரப்பட்டைகள் கொண்டது மருத மரம்.


குபேரனுடைய பிள்ளைகளான நளகுபாரன், மாணிக்ரீவன் என்ற இரட்டையர்கள் ,பெண்களோடு நிர்வாணமாக மென் வெட்கம் கூட இன்றி  ஆற்றில் குளித்ததால் ,வன்மை பெற்ற மருத மரங்களாக மாறட்டும் என்ற சாபம் பெற்றனர். கண்ணன் குழந்தையாக உரலில் கட்டப்பட்டு இருக்கும்போது உருண்டு அம்மரத்தை இடிக்கவும் சாப விமோசனம் பெற்றனர் . வன் மருத மரத்தை முறித்து நடை பயின்றவன் இந்த கண்ணன். தன் மாமனாகிய கஞ்சனை (கோதை கம்சன் என்பதில்லை கஞ்சன் என்கிறாள் வடமொழி என்பதால் ) வஞ்சகத்தால் வென்றவன் .பல பெருமைகள் பெற்றுத் திகழும் மதுரா நகர்ப்பதி அரசன் என்னை வந்து சேர்வார் எனில் நீ கூடிடு கூடலே எனக் குறி கேட்கிறாள் கோதை. 

Sunday, 10 April 2016

35.மாட மாளிகை சூழ்

35.மாட மாளிகை சூழ்
பாடல் :35
மாட மாளிகை சூழ்மது ரைப்பதி
நாடி நந்தெரு வின்நடு வேவந்திட்டு
ஓடை மாமத யானை யுதைத்தவன்
கூடு மாகில்நீ கூடிடு கூடலே!
விளக்கம் :
 மாட மாளிகை சூழ் மதுரைப் பதி - மாட மாளிகைகள் சூழ்ந்த மதுரா நகர் வேந்தன்
நாடி நம் தெருவின் நடுவே வந்திட்டு - நமை நாடி நம் தெருவின் நடுவே வந்திட்டு
ஓடை மா மத யானை உதைத்தவன் - மதம் பிடித்து ஓடி வந்த பெரிய குவலய பீடம் என்ற யானையை உதைத்தவன்
கூடுமாகில்- என்னை வந்து கூடுவான் எனில்
நீ கூடிடு கூடலே !- நீ கூடிடு  கூடலே !

மாட மாளிகைகள் சூழ்ந்த மதுரை நகர் (வடக்கிலுள்ள மதுரா எனும் நகரம் ) வேந்தன் ,நம்மை நாடி நம் தெருவின் நடுவே வந்திட்டு ,மதம் பிடித்து ஓடி வந்த பெரிய,குவலயபீடம் என்ற யானையை எட்டி உதைத்து அடக்கியவன் என்னை வந்து கூடுவான் எனில் நீ கூடி விடு கூடலே !

என்னடா வடக்கே ஒரு மதுரை தெற்கே ஒரு மதுரைன்னு குழம்பாதீங்க..நம்ம மதுரை திரிந்த பெயர்..உண்மைப் பெயர் மருதை..மருத மரங்கள் சூழ்ந்தது மருத நிலம்..வயலும் வயல் சார்ந்த நிலமும் .வடக்கே இருக்கும் மதுரை மதுரா கிருஷ்ணன் பிறந்த ஊராகக் கருதப்படுவது..அந்த மதுரையின் அதிபதி  நம்மை நாடி தெருவின் நடுவே வருகின்றாராம்..எதற்கு?  மத யானையிடம் இருந்து நமைக் காப்பாற்ற..அந்த மதுரைப் பதி எனை வந்து சேர்வார் எனில் நீ கூடிடு கூடலே என்று குறி கேட்கிறாள் கோதை
 மத யானை துரத்துவது போல , அவனைச் சேரா பெருந்துயரம் அவளைத் துரத்துகிறது..அதிலிருந்து மீட்ட அவன் வருவானா சொல்லிடு கூடலே !

Thursday, 7 April 2016

34.ஆய்ச்சிமார்களு மாயரு மஞ்சிட

34.ஆய்ச்சி மார்களு மாயரு மஞ்சிட
பாடல் :34
ஆய்ச்சி மார்களு மாயரு மஞ்சிட
பூத்த நீள்கடம் பேறிப் புகப்பாய்ந்து
வாய்த்த காளியன் மேல்நட மாடிய
கூத்த னார்வரில் கூடிடு கூடலே!

விளக்கம் : 

ஆய்ச்சி மார்களும் - ஆயர் குலத்தைச் சேர்ந்த பெண்களும்
ஆயரும் அஞ்சிட -  ஆயர் குலத்தைச் சேர்ந்த ஆண்களும் அஞ்சும்படி
பூத்த நீள் கடம்பு ஏறி - பூக்கள் நிறைந்து உயர்ந்த கடம்ப மரம் ஏறி
புகப் பாய்ந்து  - நீரில் உட்புகப் பாய்ந்து குதித்து
வாய்த்த காளியன் மேல் நடமாடிய - காளியன் என்ற நாகத்தின் மீது நடனம் ஆடிய
கூத்தனார் வரில் - கூத்தாடிய கூத்தனார் வரில்
கூடிடு கூடலே ! - நீ கூடிடு கூடலே!

ஆயர் குலப் பெண்களும் ஆண்களும் அஞ்சும்படி , பூக்கள் நிறைந்து, உயர்ந்த கடம்ப மரம் ஏறி , நீரில் தாவி அதன் உட்புகப் பாய்ந்து குதித்து காளிங்கன் என்ற நாகத்தின் மீது நடனம் ஆடிய கூத்தனார் (கூத்தாடுபவன் ) என்னைக் கூட வருவார் எனில் நீ கூடிடு கூடலே!
காளிங்க நடனம் 

யாரோ ஒருவரை குளத்தில் இருந்த பாம்பு பிடிக்க, அதை ஓடிச் சென்று கண்ணனிடம் யாரோ சொல்ல உடனே அவன் பூக்கள் நிறைந்த மிக உயரமான கடம்ப மரத்தின் மீதேறி அங்கிருந்து குளத்தின் மீது பாய்ந்து குதித்து ,  அந்தப் பாம்பினை அடக்கி அதன் மீது நடனம் ஆடினான். அப்படி ஆடுபவனைக் கூத்தன் என்கிறாள் கோதை..அந்தக் கூத்தன் தன்னைச் சேர  வருவான் எனில் நீ கூடிடு கூடலே ! பெருமாள் திருவடி தன் மீது  பட பாக்கியம் வாய்க்கப் பெற்றவன் என்பதால் வாய்த்த காளியன் என்கிறாள் கோதை ..

Sunday, 3 April 2016

33.பூம கன்புகழ் வானவர்

33.பூம கன்புகழ் வானவர்
பாடல் 33 :
பூம கன்புகழ் வானவர் போற்றுதற்
காம கன்அணி வாணுதல் தேவகி
மாம கன்மிகு சீர்வசு தேவர்தம்
கோம கன்வரில் கூடிடு கூடலே!

விளக்கம் :
பூமகன் புகழ் - பூவில் பிறந்த பிரம்மா புகழும்
வானவர் போற்றுதற் காமகன் - வானவர் போற்றுதற்கும் உரிய கா- மகன்  (காட்டு தெய்வமான திரு -மாலே (முல்லைத் தெய்வம்  )
அணி வாள் நுதல் -   ஒளிரும் அழகான  நெற்றி கொண்ட
தேவகி மாமகன் - தேவகியின் சிறந்த  மகன்
மிகு சீர் வசு தேவர்தம்  - மிகுந்த சீரும் சிறப்புமிக்க வசு தேவர் உடைய
கோ மகன் - தலைவன் (கோ -அரசன் )
வரில் - வருவார் எனில்
கூடிடு கூடலே - நீ கூடி விடு கூடலே !

பூவிலே பிறந்த பிரம்மாவும் புகழும் , வானவர் போற்றுதற்கும் உரிய காட்டிலுள்ள முல்லைத் தெய்வமான திருமாலும் , மிகவும் அழகான,   ஒளிரும்  நெற்றி கொண்ட தேவகியின்  சிறந்த மகன் , மிகுந்த சீரும் சிறப்புமிக்க புகழுடைய  வசுதேவரின் மகன்

 தலைவனான அந்தக் கண்ணன் வருவார் எனில் கூடிடு கூடலே!





Sunday, 27 March 2016

32.காட்டில் வேங்கடம்


32.காட்டில் வேங்கடம் 
பாடல் :32
காட்டில் வேங்கடம் கண்ண புரநகர்
வாட்ட மின்றி மகிழ்ந்துறை வாமனன்
ஓட்ட ராவந்தென் கைப்பற்றி தன்னோடும்
கூட்டு மாகில்நீ கூடிடு கூடலே!

விளக்கம் : 
காட்டில் வேங்கடம் - காட்டில் உள்ள திருவேங்கட மலையிலும்
கண்ணபுர நகர் -  நகரத்தில் உள்ள கண்ணபுரத்திலும்
வாட்டமின்றி மகிழ்ந்துறை வாமனன் - எந்த வருத்தமுமின்றி மகிழ்ந்து குடி கொண்டுள்ள வாமன அவதாரம் எடுத்த கண்ணன்
ஓட்டரா வந்து என் கைப்பற்றி - ஓடி வந்து என் கைப்பற்றி
தன்னோடும் கூட்டுமாகில் - தன்னோடு என்னை அணைத்துக் கொள்வானாகில்
நீ கூடிடு கூடலே ! - நீ கூடிடு கூடலே !

காட்டில் உள்ள திருவேங்கட (திருப்பதி ) மலையிலும் ,நகரத்தில் உள்ள திருக்கண்ணபுரத்திலும் எந்த வருத்தமுமின்றி மகிழ்ந்து குடி கொண்டுள்ள வாமன அவதாரம் எடுத்த கண்ணன்


ஓடி வந்து என் கைப்பற்றி, தன்னோடு என்னை அணைத்துக் கொள்வார் என்றால்

நீ எனக்காக கூடிடு கூடலே!
காட்டிலும் இருக்கார்  நகரத்திலும் இருக்கார் எம் தலைவன்..என் அருகிலும் அவன் வேண்டும்என்னை அணைத்துக் கொள்ள நற்பொழுது கூட வேண்டும்.அது நடக்குமென்று நீ கூடிடு கூடலே என்று குறி கேட்கிறாள் கோதை :) ..அது ஏன் ஓடி வந்து அணைக்கணும் என்கிறாள் ? ஆமா ஏற்கனவே பருவத்தே பயிர் செய் என்பதை அந்த கண்ணன் இன்னும் உணரல நாளும் கிழமையும் காத்திருந்து காத்திருந்து கண்கள் பூத்துப் போச்சு..ஒருக் கணமும் தாழ்த்தாமல் ,  விரைவாக வந்தென்னை அணைத்தலே தன் காதல் நோய்க்கு மருந்து என்கிறாள்..


நாஞ் சொல்லல..?  இது ஏதோ பக்தி வீடு பேறு என்ற ஆன்மிகம் இல்லை முழுக்க முழுக்க கண்ணன் மீதான கோதையின் மையலும் காதலும் :) 

Saturday, 26 March 2016

31.தெள்ளியார் பலர்

31.தெள்ளியார் பலர் கைதொழும் தேவனார் 
நாச்சியார் திருமொழி நான்காம் பத்து தொடக்கம். மனதில் நினைப்பது நடக்குமா இல்லையா என குறி கேட்கும் பழக்கம் மக்களிடையே பரவலாக உண்டு. வட்டமாகக் கோடிட்டு , அதிலே பல சுழிகளைப் போடுவது.அதிலே ஒற்றைப்படை எண்களுடன் வருகிறதா அல்லது இரட்டைப்படை எண்களுடன் வருகிறதா எனப் பார்ப்பார்கள்..ஒற்றை விழுந்தால் நடக்கும் .இரட்டை விழுந்தால் நடக்காது .(பிரபந்தத்தில் இதற்கு நேர் எதிராகப் போட்டிருக்கு..ஆனால் என் அனுபவத்திலும் என் அம்மா உட்பட பலர் செய்வதைப் பார்த்ததையும் வைத்து ஒற்றை நல்லது என்கிறேன்..ஏனெனில் காரியம் வெற்றியாக  ஒற்றை தான் கேட்பார்கள்..நம் வழக்கமே ஏழு வெத்தலை வைப்பது சுழியாக இல்லாமல் ஒன்று சேர்த்து நூற்றி ஒன்று என்று மொய் வைப்பது சீர் தட்டுகளில் கூட ஒற்றைப் படை எண்  வருமாறு தான் வைப்பார்கள் )  .சிலர் பூக்கட்டிப் பார்ப்பார்கள்..சோவி போட்டுப் பார்ப்பது இன்னொரு வகை..கோதை தன் காதலனான கண்ணனுடன் இணைவது நடக்குமா இல்லையா என கூடல் போட்டுப் பார்க்கிறாள்..அதற்கு அவற்றிடம் கூடி விடச் சொல்லிச் சொல்லி பாடுகிற பாடல்கள்தான் இந்த நான்காம் பத்துப்பாடல்கள்..,,மனிதராகப் பிறந்து கடவுளை மணத்தல் என்பது நடக்கக்கூடிய காரியமா என்ன..இருப்பினும் கோதை என்ற பேதைப்பெண் என்னவெல்லாம் செய்கின்றாள்..காதல் படுத்தும்பாடு  :)
பாடல் :31
தெள்ளியார் பலர் கைதொழும் தேவனார்
வள்ளல் மாலிருஞ்சோலை மணாளனார்
பள்ளி கொள்ளும் இடத்து அடி கொட்டிடக்
கொள்ளுமாகில் நீ கூடிடு கூடலே    

விளக்கம் :
தெள்ளியார் பலர் - தெளிந்த மனமுடையோர் பலர்
கை தொழும் தேவனார் - கை தொழும் தேவனார்
வள்ளல் மால் இரும் (இருக்கும் ) சோலை மணாளனார் - பக்தர்களுக்கு வாரி வழங்கும் வள்ளலான மால் இருக்கும் சோலையான அழகர் கோவில் மணாளனார் (மாப்பிள்ளை )
பள்ளி கொள்ளும் இடத்து - அவர் உறங்கும் இடத்தில்
அடி கொட்டிடக் கொள்ளுமாகில் - அவர் திருவடிகளைப் பிடிக்க எனக்கு அவன் அருள் கிடைக்குமாகில்
நீ கூடிடு கூடலே       - நீ கூடிடு கூடலே

தெளிந்த மனமுடையோர் பலர் கை தொழுது வணங்கும் தேவனார் (ஆர் எனும் விகுதி மரியாதையின் பொருட்டு சொல்லப்படும் ..) வள்ளல் (முன்கூட்டியே வள்ளல்னு புகழ்ந்துடனும்..அப்பத்தான் கேட்ட வரம் கொடுப்பார்ன்னு பொடி வச்சுச் சொல்றாங்களோ ?:) அழகர் மலைக்கு திருமாலிருஞ்சோலை என்ற பெயரும் உண்டு..கள்ளழகர் பெயர் பிரபலம் ஆனதால் அழகர் கோவில்,  அழகர் மலை என்றே பெயர் விளங்கலாயிற்று..அங்கே இருக்கும் பெருமாளை கல்யாண சவுந்தரராஜ பெருமாள் என்றே பெயர் பார்த்த நினைவு...கோதை அதனால்தான் மணாளனார் என்றாரோ அல்லது அவள் மனம் கொண்ட மாப்பிள்ளை என்பதால் மணாளன் என்றாலோ அவளுக்கே வெளிச்சம் :)
அவர் தூங்கும் இடத்தில் ,அவர் அடி பற்றிட  அவர் மனத்தில் இவள் கொள்ளுமாகில் (மனம் கொள்வது நடக்குமாயின் ) கூடிடு கூடலே!
அல்லது இன்னொரு பொருள் அவர் உறங்கும் இடத்தில் கட்டிலின் அடியில் கூடல் கிழங்கு கொட்டி அது அங்கே நிறையுமாகில் கூடல் வட்டம் கூடட்டும்..
புளியங்கொட்டையை பாதியாகத் தேய்த்து ,அதையும் தாயம் போல விளையாடப் பயன்படுத்துவார்கள்..

இப்படி குறி பார்த்தல் பல வகை..சோவி (சோழி பிரசன்னம் என்று கூடப் பெயர் உண்டு ) போட்டுப் பார்க்கறது..கூழாங்கல் போட்டு பார்க்கிறது..வட்டம் போட்டு அதிலே கோலப்பொடி கொட்டி எண்ணாமல் சுழியம் போட்டு அது ஒற்றையா இரட்டையா எனப் பார்த்தல் எனப் பல வகை..

கோதையின் அறிவை அவள் காதல் கொண்ட பித்து மனமே வெல்கிறது..அதனால்தான் எப்படி ஆகினும் கடவுளைச் சேர அவள் எல்லா விதத்திலும் முயற்சி செய்கிறாள்..நடக்குமா எனக் குறி கேட்கிறாள்..என்ன நடந்தது என்பது நாச்சியார் திருமொழி இறுதியில் தெரியும் :)