Monday, 27 June 2016

54.நாளைவ துவைம ணமென்று நாளிட்டு

நாளைவ துவைம ணமென்று நாளிட்டு
பாடல் :54
நாளைவ துவைம ணமென்று நாளிட்டு
பாளைக முகுப ரிசுடைப் பந்தற்கீழ்
கோளரி மாதவன் கோவிந்த னென்பான்ஓர்
காளைபு குதக்க  னாக்கண்டேன் தோழீநான்

விளக்கம் :
நாளை வதுவை மணம் என்று நாளிட்டு - நாளைக்குத் திருமணம் என்று நாள் குறித்து
பாளை கமுகு பரிசுடைப் பந்தற்கீழ் - பாக்கு மரப் பட்டைகளால் அழகுறச்  செய்யப்பட்ட  மணப்பந்தலின் கீழ்
கோள் அரி  மாதவன் கோவிந்தன் என்பான் ஓர் - குறிப்பிட்ட அந்த நன்னாளில்  அழகு பொருந்திய  ஒளிமிக்க சிங்கம் போன்றவன் மாதவன் கோவிந்தன் என்ற பெயர் கொண்ட
காளை புகுதக் கனாக் கண்டேன் தோழீ நான் - காளை கம்பீரமாகப் புகுவதைப் போலக் கனாக் கண்டேன் தோழீ நான்

இந்தாங்கப்பா இதான் மாப்பிள்ளை நல்லாப் பார்த்துக்கிடுங்க..ரொம்பப் பெரிய இடம்..அதான் பட்டையக் கிளப்பற மாதிரி பந்தாவா தெருவெல்லாம் சுத்தி ஊரறிய பொண்ணு கேட்டு வந்துட்டாரு...


பெரியவங்க இனி என்ன பண்ணனும் திருமணத்துக்கு நாள் குறிக்கனும் .. அதைத்தான் கோதை சொல்றா..நாளைக்குத் திருமணம் என்று நாள் குறிச்சு ,அந்த நன்னாளிலே , பாக்குமரப் பட்டைகளால் அலங்கரிச்சு ,அழகான மணப் பந்தல் போட்டு அதன் கீழே அழகு பொருந்திய மிடுக்குடன் ,ஒளி பொருந்திய  சிங்கம் மாதிரி நரசிம்மன் ,மாதவன் கோவிந்தன் என்ற பெயர்களை உடைய காளை கம்பீரமாகப் புகுவது போன்று கனாக் கண்டேன் தோழீ என்கிறாள்.. காளைன்னா காளை இது சாதாரணக் காளை இல்ல சல்லிக்கட்டு காளை .. யாரும் அவ்ளோ எளிதாகக் கை வைத்து விட முடியாது :))





தன் மன்னன் மாயக் கண்ணன் மாப்பிள்ளையா வரும் அழகை அவள் மனசாரக் கண்டு அதை நம்மிடம் விவரிக்கிறாள்..தோரணம் கட்டினாப் போதுமா..மணப்பந்தல் தானே கல்யாண வீட்டுக்கான அடையாளம்..இன்னார் வீட்டுல கல்யாணம் என்று பறை சாற்றுவதே பந்தக்கால் தானே..தன்னை மணம் முடிக்க வரும் மணாளன்,  வரும் அழகே தனி..பாருங்கப்பா இந்தப் பொண்ணு எங்கயோ சன்னல்கிட்ட நின்னு மாப்பிள்ளை வாரத சைட் அடிச்சிருக்கு :)) 

Sunday, 26 June 2016

53. வாரணமாயிரம்

53.வாரண மாயிரம் சூழவலம்செய்து

நாச்சியார் திருமொழி ஆறாம்பத்து இனிதே ஆரம்பம் :) மன்மதனிடம் வேண்டி , எங்கள் சிற்றில் சிதையாதே என்று இறைவனிடமே வேண்டி, உடைகளைத் திருடியவனிடம் கூறைச் சேலை கேட்டு ,தாம் கண்ணனைச் சேருவோமா என்று கூடல் குறி கேட்டு, குயில் விடு தூது வரை வந்தாச்சு..வந்து சேர்ந்தானோ சேரலையோ ஆசைப்பட்டவனோட சேர நிஜத்தில் வேணா தடை இருக்கலாம்..ஆனா கற்பனைக்கும் கனவுக்கும் தடை போட முடியாதில்லையா ? அதான் கண்ணனோட கல்யாணம் ஆனா எப்படி இருக்கும் என்று கனவு காண்கிறாள்..

பெண் பார்ப்பதில் ஆரம்பித்து , கெட்டி மேளம்கொட்டி ,(தாலி மட்டும் கிடையாது.. ஏனெனில் பண்டைய இந்துத்திருமணத்தில் அது வழக்கில் இல்லை . இது ஓர் வரலாற்றுச் சான்று.இங்கு சொல்லப்படுபவை யாவும் இந்துத் திருமண சடங்கு..தமிழர் வழக்கில் பனையோலைத்  தாலி  உண்டு..பின்னாளில் இந்து மதம் தமிழர் வழக்கை தனதாக்கிக் கொண்டது. ஞே ..நாமெல்லாம் இந்து தானே என்பவர்களுக்கு.. தமிழர்களுக்கு மதம் இல்லை வாழ்வியல் முறை மட்டுமே. அந்த அந்த கால கட்டத்தில் வந்த மதங்களை ஏற்றுக் கொண்டார்கள்..பின்னாளில் இந்து மதம் உள்வாங்கிக் கொண்டது. ஆண்டாள் பெரியாழ்வார் வீட்டில் வளர்ந்தவள். ஆகவே அங்கு பின்பற்றப்படும் சடங்குகளை அறிந்தவள்.  )    அம்மி மிதித்து அருந்ததி பார்த்து இந்து மத சடங்குகளை அடிப்படையாக வைத்து கனா காண்கிறாள்.. திருமணம் ஆகாதவர்கள் இந்தப் பதினோரு பாடல்களைப் பாராயணம் செய்தால் திருமண யோகம் கிட்டும் என்பது நம்பிக்கை..நம்பிக்கை இருக்கோ இல்லையோ அவள் கனாக் காணும் அழகைக் கண்டு ரசிக்கவாவது இதைப் படியுங்களேன் :)

தோழியிடம் தன் கனாக்களைப் பகிர்தல் 
பாடல் :53
53.வாரண மாயிரம் சூழவ லம்செய்து
நாரண நம்பி நடக்கின்றா னென்றெதிர்
பூரண பொற்குடம் வைத்துப் புறமெங்கும்
தோரணம் நாட்டக் கனாக்கண்டேன் தோழீநான்

விளக்கம் : 

வாரணம் ஆயிரம் சூழ வலம் செய்து - ஆயிரம் யானைகள் புடை சூழ தெருக்களைச் சுற்றி வந்து
நாரணன் நம்பி நடக்கின்றான் என்று  எதிர் - அந்த நாராயணன் நம்பி நடக்கின்றான் அவரை எதிர்கொண்டு வரவேற்க
பூரண பொற்குடம் வைத்துப் புறமெங்கும் - பூரண கும்பமும் பொற்குடம் வைத்து நாற்புறம் எங்கும்
தோரணம் நாட்டக் கனாக் கண்டேன் தோழீ நான் - தோரணம் நாட்டக் கனாக் கண்டேன் தோழீ நான்
 பெண் கேட்டு வாராராம் நாராயணன்..ஆனா மாப்பிள்ளை பெரிய இடமில்லியோ..அதனால  நாலா பக்கமும் தோரணம் கட்டி சும்மா தெருவே களை கட்டி இருக்க,  ஆயிரம் யானைகள் புடை சூழ அவர் கம்பீரமாக தெருக்களைச் சுற்றி வர (எதற்காக தெருக்களை வலம் வரணும்  ஆமா இவர்தான் மாப்பிள்ளைன்னு ஊர் முழுக்கத் தெரிய வேணாமா அதுக்குத்தான் )

யானையில் வலம் வந்து இறங்கி கம்பீரமாக நடந்து வருகிறார் நாராயணன் .அவரை வரவேற்கும் பொருட்டு , பூரண  கும்பம், பொன்னாலான குடத்தோட அவரை எதிர் கொள்கிறார்கள் .பெண் பார்க்க வர்றதுக்கே தோரணம் எல்லாம் தூள் கிளப்புது .வீட்டுல நல்லது நடக்குது என்பதற்கு அடையாளமாக தோரணம் கட்டுவது வழக்கம்.. கோதைக்குக் கல்யாணம்ல..அப்பக்  கண்டிப்பா தோரணம் கட்டியே ஆகணும் :) நடந்து வரும் மாப்பிள்ளைக்கு ஆலத்தி கரைச்சு குங்குமம் வச்சு வரவேற்பது இன்றளவும் உள்ள வழக்கம்.


இப்பாடலில் சொல்லப்பட்ட காட்சியை கற்பனை பண்ணிப் பாருங்க..நினைக்கவே மனசுல மகிழ்ச்சி ஒட்டிக்குதுல்ல :)

பின்ன கல்யாணம் என்றாலே வீடு களை கட்டிடும்ல..இன்னும் இருக்கு அடுத்தடுத்து பாப்போம் :)


















Thursday, 23 June 2016

52.விண்ணுற நீண்டடி தாவிய மைந்தனை

52.விண்ணுற நீண்டடி தாவிய மைந்தனை 

பாடல் :52
விண்ணுற நீண்டடி தாவிய மைந்தனை
வேற்கண் மடந்தை விரும்பி
கண்ணுறவென்கடல் வண்ணனைக் கூவு
கருங்குயி லேஎன்ற மாற்றம்
பண்ணுற நான்மறை யோர்புது வைமன்னன்
பட்டர்பி ரான்கோதை சொன்ன
நண்ணுறு வாசக மாலைவல்லார்நமோ நாராய ணாயவென் பாரே

விளக்கம் : 
விண்ணுற நீண்டு அடி தாவிய மைந்தனை - வானம் அளவு நீண்டு அடி தாவிய மைந்தனை
வேற்கண் மடந்தை விரும்பி - வேல் போன்ற கண்களை உடைய பெண் விரும்பி
கண்ணுற என் கடல் வண்ணனைக் கூவு -   தான் பார்த்து   மகிழ நேரில் வந்து சேர என் கடல் வண்ணனை வரக் கூவு
கருங்குயிலே என்ற மாற்றம் பண்ணுற  - கருங்குயிலே என்று பத்துப் பாடல்களைப் பாடினாள்
 நான்மறையோர் புதுவை மன்னன் - நான்கு மறை ஓதுபவர் வில்லிபுத்தூர் மன்னன்
பட்டர்பிரான் கோதை சொன்ன - பெரியாழ்வார் என்ற பட்டர் பிரான் மகள் கோதை சொன்ன
நண்ணுறு வாசக மாலை வல்லார் நமோ நாராயணாய என்போரே -  நன்மை விளைவிக்கும்  இந்தப் பா மாலையைப் பாடுபவர்கள் ,அவன் திருவடிகளில்  நமோ  நாராயணாய என்று கூறும் வல்லமை பெறுவார்

மடந்தை என்பதற்கு அழகான பொருள் உண்டு.. 14-19 வயது கொண்ட டீனேஜ் பெண்களைக் குறிக்கிறது .இளமை,இளமைக்குரிய அழகு ,இளமைக்குரிய மென்மை, அறியாமை குணம் கொண்டவளாம்..காதல் பித்தும் இந்த வயதில் பிடிப்பதும் இயற்கையே. உலகளந்த பெருமானை ,போர் தொடுக்கும் பலம் வாய்ந்த வேல் கொண்ட கண்ணினாள் இந்த மடந்தை கோதை , தான் கண்ணாரப் பார்த்து மகிழும் வண்ணம் அந்தக் கடல் வண்ணனை வரச் சொல்லி,  குயிலிடம்  தூதுப் பாமாலை பாடினாள் .. கண்ணுற என்பது மிக அழகான சொல்..வெறுமனே பார்ப்பது என்ற சொல்  பெரிதாக உணர்த்தி விடாது .ஆனால் கண்ணுற என்பது மனத்தினால் அகம் மகிழ்ந்து ஆசை ஆசையாய் பார்ப்பது , பார்த்துப் பார்த்தும் தீராத அன்பு  கொண்டது.. பார்ப்பதிலேயே மனம் நிறைவு கொள்வது..இத்தனை நாளும் வாழ்ந்ததே இப்படி உன்னைத் தரிசிக்கத்தான் என்று உணர்த்துவது . பார்வையிலேயே தின்பது ..மனசுக்கு நிறைஞ்சவனை கண்ணாரக் காண்பதும் பெரும் காதலே

வேதம் ஓதும் தொழிலைக் கொண்ட வில்லிபுத்தூர் மன்னன் பெரியாழ்வார் என்ற பட்டர்பிரான் மகள்  கோதை சொன்ன இப்பாமாலையை பாட வல்லார்கள் "நமோ நாராயணாய "என்று கூறி என்றும் அவன் திருவடி கிட்டும் அருள்தனைப் பெறுவார்கள் .



காதலினால் , குயில் விடு தூது சொன்ன கோதையின் நாச்சியார் திருமொழி ஐந்தாம் பத்து இனிதே நிறைவுற்றது.. :) 

அடுத்த பத்து மிகப் பிரபலமான "வாரணம் ஆயிரம் " 

51.அன்றுல கம்மளந் தானையுகந்தடி

51.அன்றுல கம்மளந் தானையுகந்தடி
பாடல் :51
அன்றுல கம்மளந் தானையுகந்தடி
மைக்கண வன்வலி செய்ய
தென்றலுந் திங்களு மூடறுத் தென்னை
நலியும் முறைமை யறியேன்
என்றுமிக் காவி லிருந்திருந் தென்னைத்
தகர்த்தாதே நீயும் குயிலே
இன்றுநா ராயண னைவரக் கூவாயேல்
இங்குத்தை நின்றும் துரப்பன்

விளக்கம் : 
அன்று உலகம் அளந்தானை உகந்து - அன்று உலகம் அளந்தவனை மனத்திற்கு உகந்தவனாகக் கொண்டு விரும்பினேன்
அடிமைக்கண் அவன்  செய்ய -  அவனுக்கு அடிமையாய் இருக்கும் பொருட்டு அவனை  விரும்பினால் அவனோ என்னை வந்து சேராமல் எனக்கு வேதனையையேத் தந்தான்
தென்றலும் திங்களும் ஊடு அறுத்து -  தென்றலும், நிலவும் என் உயிரின் ஊடே பிளந்து
என்னை  நலியும் முறைமை அறியேன் - என்னை வதைப்பது என்ன  முறையோ நான் அறியேன்
என்றும் இக்காவில் இருந்து என்னைத் - எப்பொழுதும் இந்தச் சோலையிலே இருந்து
தகர்த்தாதே நீயும் குயிலே என்னை - நீயும் உயிரை வதைக்காதே குயிலே
இன்று நாராயணனை வரக் கூவாயேல் - இன்றே நாராயணனை என்னோடு வந்து இணைய வர நீ கூவாவிடில்
இங்குத்தை நின்றும் துரப்பன் - இங்க இருந்து உன்னை துரத்திடுவேன்  பார்த்துக்க .

அன்று உலகம் அளந்தவனை விரும்பியது மனத்திற்கு உகந்ததாக இருந்தது..அவனுக்கு அடிமையாய் இருக்கும் பொருட்டு விரும்பினால் அவனோ என்னை வந்து சேராமல் எனக்கு வேதனையைத் தந்தான். அவனைப் பிரிந்திருக்கும் இத்தருணத்தில் , அவன் இல்லாத் தனிமையின் வேதனையை இன்னும் கூட்டும் விதமாக தென்றலும் நிலவும் என் உயிரின் ஊடே பிளந்து என்னை வதைப்பது எந்த வகை நியாயம் என்று எனக்குத் தெரியலையே..


ஏற்கனவே இப்படி ஒரு வேதனையில் நான் வாடிக் கொண்டு இருக்கிறேன் இதுல நீ வேற இந்தச் சோலையில்  இங்கேயே இருந்து  கொண்டு கூவி உன் பேடையோடு கூடி மகிழ்ந்து அதைப் போல் என்னாலும் இருக்க முடியவில்லையே என்று நான் வேதனைப்படும்படி என்னைத் துன்புறுத்தாதே ..இன்றே அந்த நாராயணனை   என்னைச் சேர நீ கூவாவிடில் நான் இந்தச் சோலையில் இருந்து உன்னைத் துரத்திடுவேன் பார்த்துக்க



கோபம் வரப் பல காரணங்கள் உண்டு..அதிலே ஒன்று மோகமும் ,  பிரிவாற்றாமையும் .அதை இறக்கி வைக்கத் தகுந்த தோள் அருகே இல்லாத பொழுதில் பித்து பிடிக்கும்..கோதைக்கும் இங்கே அந்நிலை தான்.. பெண்ணுக்கு தொட்டதுக்கெல்லாம் கோபம் வருகிறது என்றால் ஆங்கே கோபம் தொடாததுக்குத்தான் என்றறிக :) அதனால்தான் குயிலிடம் விதம் விதமாக தன் வேதனையைச் சொன்னவள் இறுதியில் நாராயணன் வந்து தொடாத கடுப்பைக் குயிலிடமே காட்டுகிறாள். இன்றே அவரை வரச் சொல்லு இல்லாட்டி இந்தச் சோலையில் இருந்தே உன்னைத் துரத்திடுவேன் என்று வெகுண்டு மிரட்டுகிறாள்..

பூங்காற்று மெதுவாகத் தொட்டாலும் போதும் 
பொன்மேனி நெருப்பாகக் கொதிக்கின்றது 
நீரூற்றிப் பாயாத நிலம் போல  நாளும் 
என் மேனி தரிசாக இருக்கின்றது 
தனிமையிலும் தனிமை கொடுமையிலும் கொடுமை 
இனிமை இல்லா வாழ்வில் எதற்கு இந்த இளமை 

ஏனோ இந்தத் திரைப் பாடல் வரிகள் யாவுமே கோதைக்கு வெகுவாகப் பொருந்திப் போகின்றது..வாலி பெண்ணின் மனத்தைத் தொட்டு எழுதிய நின் பேர் , பார் இருக்கும்வரை வாழி .
சமீபத்தில் டிவிட்டரில் "நச்" என்று ஒரு கவிதை படித்தேன்.

புணர ஆள் இல்லாதவர்களே 
மழை நேரத்தில்  கவிதை எழுதிக்கொண்டு இருக்கிறார்கள் 

நெற்றிப்பொட்டில் அடித்தாற் போன்ற வரிகள்.. மார்கழிக் காலையும் மழை நேரத்து மாலையும் துணையற்றவர்களுக்கு பெரும் சாபம்.இருப்பவர்களுக்கு வரம் :)
போதும் ஓடிடுவோம்..கோதை ஏற்கனவே கண்ணன் இல்லாத கோபத்தில் குயிலைக் கடிந்து கொண்டிருக்கிறாள்..இதிலே நாம் வேறு வெறுப்பேற்ற வேண்டாம்







Friday, 17 June 2016

50.பைங்கிளி வண்ணன் சிரீதர னென்பதோர்

50.பைங்கிளி வண்ணன் சிரீதர னென்பதோர் 
பாடல் :50
பைங்கிளி வண்ணன் சிரீதர னென்பதோர்
பாசத் தகப்பட்டி ருந்தேன்
பொங்கொளி வண்டிரைக் கும்பொழில் வாழ்குயி
லே!குறிக் கொண்டிது நீகேள்
சங்கொடு சக்கரத் தான்வரக் கூவுதல்
பொன்வளை கொண்டு தருதல்
இங்குள்ள காவினில் வாழக் கருதில்
இரண்டத்தொன் றேல்திண்ணம் வேண்டும்.

விளக்கம் :

பைங்கிளி வண்ணன் சிரீ தரன் என்பதோர் பாசத்தில் அகப்பட்டிருந்தேன் - பசுமையான கிளி வண்ணம் கொண்ட சிறீதரன் என்பதோர் பாசத்தில் நான் அகப்பட்டிருந்தேன்..
பொங்கும் ஒளி வண்டு இரைக்கும் பொழில் வாழ் குயிலே ! - ஒளிமிக்க வண்டுகள்  ரீங்காரமிடும்  சோலையில் வாழும் குயிலே
குறிக் கொண்டு இது நீ கேள் - நான் சொல்றதைக் கவனமா கேளு
சங்கொடு சக்கரத்தான் வரக் கூவுதல் - சங்கு கூட சேர்த்து சக்கரமும்  வச்சிருக்கறவனை வரக் கூவு
பொன்வளை கொண்டு தருதல் - அல்லது    என் பொன் வளையல்களைத் திருப்பிக் கொடு
இங்குள்ள காவினில் வாழக் கருத்தில் - இங்கு உள்ள சோலையினில் நீ வாழ வேண்டும் எனில்
இரண்டத் தொன்றேல் திண்ணம் வேண்டும்  - இந்த இரண்டில் ஒன்றை நீ உறுதியாகச் செய்தே தீர வேண்டும்..

பசுங்கிளி போன்ற பச்சை நிறத்தவன் ஸ்ரீ தரன்..அவன் மீது பாசம் வைத்து அதிலேயே அகப்பட்டுக் கொண்டேன்.. ஒளிமிகுந்த வண்டுகள் ரீங்காரமிடும் சோலையில் வாழும் குயிலே !


நான் சொல்வதைக் கவனமாகக் கேள்..  (சொல்றதைக் குறிச்சுக்க note it down ..and DO what I say )
சங்குடன் சக்கரமும் வைத்திருப்பவனை வரச் சொல்லிக் கூவு..இல்லையேல்..அவர் என்னைச் சேராத காரணத்தால் மெலிந்ததில் கழண்டு விழுந்த என் பொன் வளையல்களைத் திருப்பிக் கொடு.. இந்தச் சோலையில் நீ வாழனும் என்றால் , நான் சொன்ன இந்த இரண்டில் ஒன்றை நீ உறுதியாகச் செய்தே தீர வேண்டும்...பார்த்துக்க..!


குயிலைக் கெஞ்சி ,  கொஞ்சிப் பார்த்தாச்சு..அடுத்து அதிரடியா மிரட்டல் தான் .. நீ இங்க இருக்கணும்னா அந்த சக்கரத்தான் என்கிட்டே இருக்கணும்..ஒன்னு அவனை வரச் சொல்லு..அல்லது அவன் மீது காதல் அன்றி பச்சைப் பால்முகத்தோடு நான் திரிஞ்சேனே ஒரு காலத்துல..அதே கோதையை திருப்பிக் கொடு..அப்பத்தான்  என்  பொன் வளையல் திரும்பப் போட முடியும்..
காதலனை அவன் இவன் என விளிக்கும் பண்பை ஆரம்பித்தவளே இந்தப் பெண் தான் போல :) ஏதோ அந்தக் கலாசாரம் இப்ப புதுசா வந்த மாதிரி அங்கலாய்க்கறாங்க :)
(இதற்கு திருப்பாவையிலேயே முன் ஜாமீன் பெற்றுக் கொண்டுவிட்டாள் ..சிறுபிள்ளைகள் உன் பேர் அழைத்தால் சீறி அருளாதே..)


Thursday, 16 June 2016

49.சார்ங்கம் வளைய வலிக்கும் தடக்கைச்

49.சார்ங்கம் வளைய வலிக்கும் தடக்கைச் 
பாடல் :49
சார்ங்கம் வளைய வலிக்கும் தடக்கைச்
சதுரன் பொருத்த முடையன்
நாங்களெம் மில்லிருந் தொட்டிய கச்சங்கம்
நானு மவனு மறிதும்
தேங்கனி மாம்பொழில் செந்தளிர் கோதும்
சிறுகுயி லேதிரு மாலை
ஆங்கு விரைந்தொல்லை கூகிற்றி யாகில்
அவனைநான் செய்வன காணே

விளக்கம் :
சாரங்கம் வளைய வலிக்கும் தடக்கைச் சதுரன் பொருத்தம் உடையன் - வில்லை வளைத்து இழுக்கும் பலம் பொருந்திய கைகளை உடையவன்
நாங்கள் எம்மில் இருந்து ஒட்டிய கச்சங்கம் - நாங்கள் இருவரும் எங்களுக்குள் செய்து கொண்ட ரகசிய ஒப்பந்தம்
நானும் அவனும் அறிதும் - நானும் அவனும் மட்டுமே அறிவோம்
தேங்கனி மாம்பொழில் செந்தளிர் கோதும் சிறு குயிலே ! - இனிமையான கனிகள் நிறைந்த மாந்தோப்பிலே செம்மையான (சிவப்பான ) தளிர்களைக் கோதும் சிறிய குயிலே !
திருமாலை ஆங்கு விரைந்து ஒல்லை கூகிற்றி ஆகில் - திருமால் இருக்கும் இடம் சென்று அவரை என்னை விரைந்து   வந்து சேரக்  கூவுவாய் எனில்
அவனை நான் செய்வன காணே - அவனை நான் என்ன செய்யறேன்னு மட்டும் பாரு !

வில்லை இழுத்து வளைக்கும் பலம் பொருந்திய கைகளை உடையவன் ,அவனும் நானும் எங்களுக்குள் செய்து கொண்ட ஒப்பந்தம் நானும் அவனுமே அறிவோம். அது எங்களது அந்தரங்கம்:)   இனிமையான கனிகள் நிறைந்த மாந்தோப்பிலே செம்மையான தளிர்களைக் கோதும் சிறிய குயிலே !
என் திருமாலை நான் இருக்கும் இடத்துக்கு விரைந்து வர சீக்கிரம் சென்று நீ சொல்வாய் எனில் ,அவன் வந்த பிறகு நான் அவரை என்னவெல்லாம் செய்யப் போகின்றேன் என்று மட்டும் பார் !



Image result for lord sriram

என்னவர்,  வில்லை சும்மா வளைச்சுப் பிடிச்சா எப்படி இருக்கும் தெரியுமா..அப்படி நிற்பார்..அந்தக் கைகள் அவ்வளவு பலம் பொருந்தியவை....  எவரும் இல்லாத் தனிமையில் அப்படி என்ன இரகசியம் பேசினாளோ அப்பேர்ப்பட்ட காதலனோடு.. என்னதான் குயிலைத் தூது செல்லச்சொன்னாலும் அந்தரங்கம் சொல்ல மறுக்கிறாள் இவ்விடத்தில் :) திடீர்னு வெட்கம் வந்துடுச்சு போல :) செந்தளிரைத் தலை கோதுதாம் குயில்..   யாராவது சேட்டை செஞ்சா டேய்..என் கையில நீ சிக்கின என்ன பண்றேன் பாரு உன்ன..என்று மொழிவோம்..அது போலவே அழகாகச் சொல்கிறாள் கோதை :)
என் மச்சானைப் பார்த்தீங்களா..தேங்கனி மாந்தோப்புல ..குயிலக்கா கொஞ்சம் நீ பார்த்தா சொல்லு..அவர் வந்தாரா காணலியே அவர் வந்தாரா காணலியே 

Saturday, 11 June 2016

48.பொங்கிய பாற்கடல் பள்ளிகொள் வானை

48.பொங்கிய பாற்கடல் பள்ளிகொள் வானைப் 
பாடல் :48
பொங்கிய பாற்கடல் பள்ளிகொள் வானைப்
புணர்வதோ ராசயி னால்என்
கொங்கை கிளர்ந்து குமைத்துக் குதுகலித்
தாவியை யாகுலஞ் செய்யும்
அங்குயி லே!.உனக் கென்ன மறைந்துறைவு
ஆழியும் சங்குமொண் தண்டும்
தங்கிய கையவ னைவரக் கூவில்நீ
சாலத் தருமம் பெறுதி

விளக்கம் :
பொங்கிய பாற்கடல் பள்ளி கொள்வானைப் - பொங்கி எழுந்த பாற்கடலில் அரவணையில் பள்ளி கொண்டு இருப்பவனைப்
புணர்வதோர் ஆசையினால் - கூடல் செய்கின்ற ஆசையினால்
என் கொங்கை கிளர்ந்து குமைத்துக் குதுகலித்து  - என் முலைகள்
கிளர்ந்து சூடாகி குதூகலம் கொண்டு
ஆவியை  ஆகுலஞ் செய்யும் - என் உயிரைத் துன்புறுத்தும்
அங்குயிலே ! உனக்கென்ன மறைந்து உறைவு - அழகிய குயிலே ! உனக்கென்ன மறைவு வாழ்க்கை வேண்டிக் கிடக்கு
ஆழியும் சங்கு மொண் தண்டும் - சக்கரமும் சங்கும் கதையும்
தங்கிய கையவனை வரக் கூவில் - கையில் கொண்டவனை வரக் கூவுவாய் எனில்
நீ சாலத் தருமம் பெறுதி - உனக்கு ரொம்பப் புண்ணியம் கிடைக்கும்

பொங்கிய பாற்கடலில் பாம்பின் மீது படுத்துறங்கும் திருமாலைப் புணர்கின்ற ஆசையினால் , என் முலைகள் கிளர்ந்து வெப்பமேறி குதூகலம் கொண்டு என் உயிரைத் துன்பம் செய்யும். .




அழகிய குயிலே ! உனக்கென்ன இந்த மறைவு வாழ்க்கை..சங்கும் சக்கரமும் கதையும் தன் கைகளிலே தாங்கியவனை நீ வரக் கூவுவாய் எனில் உனக்கு ரொம்பப் புண்ணியமா போகும்..

என்ன அழகான பேச்சு வழக்கு..எவரிடமாவது நாம் விரும்பிய காரியம் நடந்தே ஆக வேண்டுமெனில் அதுவும் அது அவர்களால் நடக்கக் கூடும் எனில் யப்பா சாமி இதை நீயே செஞ்சுடேன் உனக்குப் புண்ணியமாப் போகும்ன்னு சொல்லுவோம்..அதை இங்கே அழகாகச் சொல்கிறாள் கோதை.. :)
பெண்களின் வேட்கை,  அப்பொழுது அவர்தம் உடலில் ஏற்படும் மாற்றங்களையும் அழகாக வெளிப்படுத்துகின்றாள்..

இதனால் தானோ என்னவோ இந்த நாச்சியார் திருமொழி பிரபலம் ஆக விடாமல் மறைத்து விட்டார்களோ என்றெண்ணுகிறேன்..இன்றளவும் தன் விருப்பத்தை வெளிப்படுத்தும் வெளிப்படையாகப் பேசும் பெண்களை குடும்பப் பெண்களாக பார்க்கத் தவறுகிறார்கள். அது அநாகரிகம் ,பண்பாடு இல்லை  என காலங்காலமாக மரபணுவிலேயே பதியப்பட்டு வருகின்றது . இதனாலேயே வெளிப்படையாகப் பேசும் பெண்களை பெண்களுக்கே பிடிப்பதில்லை. அதே நேரம் வெளிப்படையாகப் பேசுதல் என்பதைத் தவறாகப் புரிந்து கொண்டு புரட்சி செய்கிறேன் பேர்வழிகளையும் எமக்கு அறவே பிடிப்பதில்லை. உள்ளார்ந்த நிமிர்வுக்கும் , அசட்டுத்தனமான கவன ஈர்ப்புக்கும் வித்தியாசம் தெரியாதவர்கள்.

ஆனால்ஆண்டாளைப் பிடித்திருக்கிறது. அவள் தன் உணர்வுகளை அழகாகச் சொல்லும்விதம் பிடித்திருக்கின்றது :) இதனாலேயே என் மனத்திற்கு மிக அருகில் வந்து அமர்ந்துகொண்டு விட்டாள்.

பக்தி என்பதைத் தாண்டி கண்ணன் மீதான காதலும் காமமும் வெகு அழகு :)
அவள் பாடல்களைத்  தொடர்ந்து ரசிப்போம் !