Tuesday, 2 February 2016

7.காயுடை நெல்லொடு கரும்பமைத்து

7. காயுடை நெல்லொடு கரும்பமைத்து
பாடல் :7 காயுடை நெல்லொடு கரும்பமைத்துக் 
கட்டி யரிசி யவலமைத்து
வாயுடை மறையவர் மந்திரத்தால் 
மன்மதனே உன்னை வணங்குகின்றேன்
தேயமுன் னளந்தவன் திரிவிக்கிரமன் 
திருக்கைக ளாலென்னைத் தீண்டும்வண்ணம்
சாயுடை வயிறுமென் தடமுலையும் 
தரணியில் தலைப்புகழ் தரக்கிற்றியே

விளக்கம் :  காய் உடை  நெல்லொடு கரும்பு அமைத்து -  பச்சை  நெல்லோடு கரும்பமைத்து
கட்டி அரிசி அவல் அமைத்து  - அதைக் கட்டி, சுற்றி அரிசிஅவலும் வைத்து
வாயுடை மறையவர் மந்திரத்தால் - வேதம் ஓதுபவர்கள் சொல்லும் மந்திரத்தால்
மன்மதனே உன்னை வணங்குகின்றேன்- மன்மதனே உன்னை வணங்குகிறேன்
தேயம் முன் அளந்தவன் திரிவிக்கிரமன் - உலகளந்த திரிவிக்கிரமன்
திருக்கைகளால் என்னைத் தீண்டும்வண்ணம் -திருக் கைகளால் என்னைத் தொடும் வண்ணம்
சாயுடை வயிறும் என் தடமுலையும் -சாய்ந்த என் வயிறும் பருத்த முலைகளும்
தரணியில் தலைப்புகழ் தரக்கிற்றியே - கண்ணனால் தொடப்பட்டவை என்று இந்த உலகத்திலே புகழ்பெற எனக்கு அருள் செய்துவிடு
மன்மதா !

பால்பிடிக்கும் பச்சை நெல்லோடு கரும்பமைத்து ,

அத்தோடு   அரிசிஅவலும்வைத்து ,
சிவப்புஅரிசிஅவல்

நன்கு வேதம் ஓதுபவர்கள் சொல்லும் அதே மந்திரங்களால் நானும் ஓதி உன்னை வணங்குகிறேன்.. மூவுலகத்திற்கும் அதிபதியான உலகளந்த உத்தமன் திருக்கைகளால் என்னைத் தீண்டும் வண்ணம் ,

ஓங்கிஉலகளந்த உத்தமன் 
சாய்ந்த என் வயிறும் ,என் பெரு மார்பும் ,கண்ணனால் தொடப்பட்டவை என்று இந்த உலகத்திலே பெரும்புகழ் அடைய அருள் செய்..

ஆண்டாள்தான் எவ்வளவு விதமான பூஜைகள் செய்யறாங்க..எல்லாம் அந்த ஒருவனுக்காக..மாய கண்ணனுக்காக..மனத்திற்கினியான் (sweet heart ) என்று திருப்பாவையில் அழைத்த அந்த ஆருயிர் வேந்தனுக்காக..தன் உடலும் உள்ளமும் அவன் ஒருவனுக்கே சென்று சேர வேண்டும் என்ற உயர்ந்த காதல் அவங்களுடையது..உலகளந்த உத்தமனே தன் உடலையும் அவனே அளக்க வேண்டும் என்கிறாள் ...

ஏட்டி கள்ளச்சி.. :)

6. உருவுடை யாரிளை யார்கள்நல்லார்

6.உருவுடை யாரிளை யார்கள்நல்லார் 
பாடல் :6
உருவுடை யாரிளை யார்கள்நல்லார் 
ஓத்துவல் லார்களைக் கொண்டு வைகல்
தெருவிடை யெதிர்கொண்டு பங்குனிநாள் 
திருந்தவே நோற்கின்றேன் காமதேவா
கருவுடை முகில்வண்ணன் காயாவண்ணன் 
கருவிளை போல்வண்ணன் கமலவண்ணத்
திருவுடை முகத்தினில் திருக்கண்களால் 
திருந்தவே நோக்கெனக் கருளுகண்டாய்

விளக்கம் :
உருவுடையார் இளையார்கள்- உருவில் இளமையானவர்கள் ,
நல்லார் ஓத்துவல் லார்களைக் கொண்டு- மறை ஓதும் நல்லார்களைக் கொண்டு 
வைகல்- அதிகாலையில் 
தெருவிடை எதிர்கொண்டு- உன்னை தெருவினுக்கே வந்து எதிர்கொண்டு வரவேற்று 
பங்குனிநாள் திருந்தவே - பங்குனி நாள் முழுவதுமே 
நோற்கின்றேன் காமதேவா- நோன்பு நோற்கின்றேன் காமதேவா 
கருவுடை முகில்வண்ணன்- மேகத்தின் நிறம் கொண்டவன் 
காயாவண்ணன் - காயாம்பூ நிற வண்ணன் 
கருவிளை போல்வண்ணன் -கருவிளம்  பூ போன்ற நிறத்தான்
கமலவண்ணத் -தாமரை போன்ற முகத்தான்
திருவுடை முகத்தினில் - அவன் முகத்தினில் உள்ள 
திருக்கண்களால் திருந்தவே  -திருக்கண்களால் தெளிவாக 
நோக்கெனக் கருளுகண்டாய் -என்னைப் பார்க்கவே அருள் செய்வாய் !

உருவிலே இளமையானவர்கள் வேதம் ஓதுபவர்களைக் கொண்டு , அதிகாலையில் (வைகறை -இரவு 2-6 சூரியோதயத்துக்கு முன் ) தெருவினுக்கே வந்து எதிர் கொண்டு வரவேற்று , பங்குனி நாள் நோன்பு நோற்கின்றேன் காமதேவா !

கருப்பு நிறம் கொண்ட மேகத்தின் நிறத்தான் ,காயாம் பூ வண்ணன் நிறத்தான்(காயாம்பூ என்பது முல்லை நிலத்து மலராம்..முல்லை நிலத் தெய்வமும் மாலே..) 
காயாம்பூ 
 கருவிளம்பூ (சங்குப்பூ ) நிறம் கொண்டான் , தாமரை வண்ணம் கொண்டவன் அந்த அழகிய முகத்தினில் உள்ள திருக்கண்களால் என்னை நோக்கும் பேறு எனக்குக் கிடைக்க அருள் செய்வாய்..

கருவிளை -சங்குப்பூ 
மார்கழி ,தை ,மாசின்னு பாட்டுப் படிச்சவங்க பங்குனிக்கு வந்துட்டாங்க :) சித்திரையில்  தான் இந்திரவிழா (முன்பு காமவேள் விழா ) நடக்குமாம்.. அதனை வரவேற்கும் பொருட்டே பங்குனியில் நோன்பு, இருக்காங்க..உருவிலே இளமையானவர்கள் வேதம் ஓதுபவர்கள் மந்திரங்கள் ஓதி, அதிகாலையில் தெய்வம் வீதி உலா வரும் தெருவுக்கே வந்து எதிர்கொண்டு (மதுரையில் இதை எதிர்சேவை என்பர்..கள்ளழகர் அழகர் மலையில் இருந்து மதுரை வரும்போது மதுரை வரட்டும் பார்ப்போம் என்றிராமல் அவர் வரும் பாதையில் சென்றே அவரை வரவேற்று தரிசிப்பது ) பங்குனி நாள் முழுவதும் நோன்பு நோற்கிறேன் காமதேவா..இதுல தெருவிடை எதிர்கொண்டு எவ்வளவு அழகான சொல்லாடல் தெரியுமா..விருந்தோம்பல் ..எந்த ஒரு விருந்தினரையும் எதிர்கொண்டு அழைப்பதே நற்பண்பு..எவராவது வந்தா வீட்டின் அறையில் அமர்ந்து கொண்டு வரட்டும் என்றில்லாமல் வாசலுக்கே சென்று வரவேற்பது..அதே போல வாசலுக்கே சென்று விடை தருவது..


நான் ஒன்றும் சிறுபிள்ளை இல்லை..முன்னப்பின்ன சரியா கவனிக்காவிடிலும்  இப்ப நல்லா கவனிச்சுப்பாரு வளர்ந்துட்டேன் என்கிறாள் ஆண்டாள்..கடைக்கண் பார்வை இல்ல..நின்னு நேரா நிமிர்ந்து பாரு முழுதாக ஆட்கொள் உச்சந்தலையில் இருந்து உள்ளங்கால் வரை அணு அணுவாக உன் மீது காதல் கொண்டவளை,  நன்கு கண்டுணர்ந்து கொள்ள வேண்டுகிறாள் கோதை :)


Monday, 1 February 2016

5. வானிடை வாழுமவ் வானவர்க்கு

5. வானிடை வாழுமவ் வானவர்க்கு 
பாடல் :5
வானிடை வாழுமவ் வானவர்க்கு
மறையவர் வேள்வியில் வகுத்த அவி,
கானிடைத் திரிவதோர் நரி புகுந்து
கடப்பதும் மோப்பதும் செய்வதொப்ப,
ஊனிடை யாழி சங் குத்தமர்க்கென்று
உன்னித் தெழுந்தவென் தடமுலைகள்,
மானிட வர்க்கென்று பேச்சுப்படில்
வாழகில் லேன்கண்டாய் மன்மதனே
விளக்கம் : 
வானிடை வாழும் அவ்   வானவர்க்கு - வானத்தில் வசிக்கும் தேவர்கள் உள்ளிட்ட தெய்வங்களுக்கு
மறையவர் வேள்வியில் வகுத்த அவி - வேதம் ஓதுபவர்கள் வேள்வியில் இட்ட வேள்விப் பொருட்களை )
கானிடைத் திரிவதோர் நரி புகுந்து - காட்டில் திரியும் நரி புகுந்து
கடப்பதும் மோப்பதும் செய்வது  ஒப்ப - அதைக் கடந்து செல்வதோ அல்லது முகர்ந்து பார்ப்பதோ செய்வதைப்போல
ஊனிடை யாழி சங்கு உத்தமர்க்கு என்று - என் உடம்பும் சங்கு சக்கரம் கொண்ட உத்தமனுக்கென்றே
உன்னித்து  எழுந்த என் தட முலைகள் - விம்மி எழுந்த என் பெரிய முலைகள்
மானிடவர்க்கு  என்று பேச்சுப் படில் - சாதாரண மனிதர்களுக்கு என்ற பேச்சு வந்தால்
வாழகில்லேன் கண்டாய் மன்மதனே - வாழவே மாட்டேன்  பார்மன்மதனே

நன்றி :கூகிள் 
வேதம் ஓதுபவர்களால் வானுலகத்தில் வாழும் வானவர்க்கு என்று  செய்த வேள்வியில் போடப்பட்ட பொருட்களை  (அக்காலத்தில் பசு,ஆடு போன்றவை  வேள்வியில் இடப்பட்டன என்பது மணிமேகலை நூலில் உள்ள வரலாற்றுத் தகவல்), கான் (காட்டில் ) திரியும் நரி வந்து முகர்ந்து பார்ப்பது எவ்வளவு தகாத ஒன்றோ அதைப் போல சங்கும் சக்கரமும் ஏந்திய உத்தமனுக்கென்றே படைக்கப்பட்ட என் ஊனும் உயிரும் (ஊன் -உயிர் ) பிறிதொரு மானிடனுக்கு இல்லை என்று ஆவேசமாகச் சொல்றாங்க.. உலகளந்த உத்தமனுக்கே என் உடம்பு அவனுக்கென்றே ஆனவை விம்மி எழுந்த என் பருத்த முலைகள்..என் உடல் சாதாரண மனிதனுக்கென்று பேச்சு வந்தால் வாழவே மாட்டேன் மன்மதனே என்று கோபமும் வீராவேசமுமாகச் சொல்கிறாள் ஆண்டாள்..



என்ன ஒரு கோபம் என்ன ஒரு வேகம்.. !! வாழ்ந்தால் மகா தேவனோடு வீழ்ந்தால் மரண தேவனோடு ன்னு படார்னு சொல்லிட்டாளே :(
பாவம் பெரியாழ்வார்..  கல்யாணப் பேச்சு எடுக்கவும் ஒரே போடா போட்டுட்டாங்க இப்படிச் சொல்லி.. :)
இதாங்க நம்ம பொண்ணுங்க கலாச்சாரம் பண்பாடு.. :) ஒருவனை உயிருக்குயிராக நினைச்சுட்டா உலகமே எதிர்த்தாலும் அசர மாட்டாங்க அப்படி வாழ்ந்திருக்காங்க..கலாச்சாரம் பண்பாடு என்பவை உடைகளில் அல்ல..மனத்தில்..எந்த இடத்தில் தன் உடல்,  தான் விரும்பும் ஒருவனுக்கே /ஒருத்திக்கே என்று நாம் நினைக்கின்றோமோ அந்த இடத்தில் வாழ்கின்றது காமம் தாண்டிய காதல்.. இது மணமுறிவு, காதல் முறிவுகள் அதிகம் நிறைந்த காலம்..மறுக்கல ..ஆனால் மனம் கொண்டவளை/வனை அதிகமா நேசித்தவங்ககிட்ட கேளுங்க அந்த வலி புரியும்..எல்லாம் ஆண்டாள் போல மனத்திண்மை உடையவர்கள் இல்லை எனினும் அவ்வலியைச் சகிச்சு வாழப் பழகி இருப்பாங்க..
காமம் பொதுவானது..ஆனால் அதை எவருடன் மட்டும் பகிர விரும்புகிறோமோ அதுவே காதல்.  அது அந்தரங்கமானது..
ஆண்டாளின் காமம் அவளின் காதல் சார்ந்தது..அவளைக் கண்ணன் அல்லாத  பிறிதொருவன் தொடுவது கடவுளின் உணவை எச்சில் படுத்துவது போல என்கிறாள்..இதிலே ஆபாசம் இல்லை..பெண்மை மட்டுமே இருக்கிறது..இனி வரும் பாடல்களை இந்த மனநிலையோடு மட்டுமே அணுகுங்கள்..அவள் வேதனை புரியும் காதல் புரியும் தவிப்பு புரியும்..அவள் நியாயம் புரியும்..

"பெண்ணோடு தோன்றி பெண்ணோடு பெண்ணோடு வாழ்ந்தும் பெண் மனது என்னவென்று புரியவில்லையோ .."- கண்ணதாசன்

4. சுவரில் புராணநின் பேரெழுதி

4.சுவரில் புராணநின் பேரெழுதி 

பாடல் :4
சுவரில் புராணனின் பேரெழுதிச்
சுறவநற் கொடிகளும் துரங்கங்களும்,
கவரிப் பிணாக்களும் கருப்புவில்லும்
காட்டித்தந் தேன்கண்டாய் காமதேவா,
அவரைப் பிராயந் தொடங்கிஎன்றும்
ஆதரித் தெழுந்தவென் தடமுலைகள்,
துவரைப் பிரானுக்கே சங்கற்பித்துத்
தொழுதுவைத் தேனொல்லை விதிக்கிற்றியே

விளக்கம் : 
சுவரில் புராண நின் பேரெழுதிச்- சுவரில் கண்ணன் பெயரெழுதி
சுறவனற்கொடிகளும் - மீன் கொடிகளும்
துரங்கங்களும் - குதிரைகளும்
கவரிப் பிணாக்களும் - கவரி கொண்டு செய்த சாமரம் வீசும் பெண்களும்
கருப்பு வில்லும் - கரும்பு வில்லும்
காட்டித் தந்தேன் கண்டாய் காமதேவா - எல்லாம் உனக்கே வரைந்தேன் பார் காமதேவா
அவரைப் பிராயந் தொடங்கி - அவரைச் சிறு வயது முதலிருந்தே
என்றும் ஆதரித் தெழுந்தவென் தட முலைகள்  - என்றைக்கும் விரும்பி என் பெரிய முலைகள்
துவரைப் பிரானுக்கே - துவாரகை மன்னனாகிய கண்ணனுக்கே
சங்கற்பித்து - உரியது
தொழுது வைத்தேன் - என்று வேண்டி வைத்தேன்
ஒல்லை விதிக்கற்றியே - இதை விரைவாகச் செய்து என்னை அவருக்கே ஆட்படச் செய்வாயாக !

சுவரில்...நல்லாப் பார்த்துக்கிடுங்க..சுவரில் என்றுதான் எழுதி இருக்காங்க சுவற்றில் என்று எழுதல..அதனால் இனி பிழையாகச் சுவற்றில் என்று எழுதாதீங்க.. இந்த ஆண்டாள் ஆயிரத்தில் ஒருத்தி..
"ஆயிரத்தில் ஒருத்தியம்மா நீ..
உலகம் அறிந்திடாத பிறவியம்மா நீ..
பார்வையிலே குமரியம்மா பழக்கத்திலே குழந்தையம்மா
ஆயிரத்தில் ஒருத்தியம்மா நீ "

பாலிலும் வெண்மை பனியிலும் மென்மை ..
பச்சை இளங்கிளி மொழி நீ சொல்வது உண்மை..
பாவிகள் நெஞ்சம் உரைத்திடும் வஞ்சம் உண்மை எனச் சொல்வதற்கு தெய்வமும் அஞ்சும்..
ஆதாரம் நூறென்று ஊர் சொல்லலாம்..
ஆனாலும் பொய் என்று நான் சொல்லுவேன்..
ஆயிரத்தில் ஒருத்தியம்மா நீ..
கண்ணதாசன் எழுதிய இந்தத் திரைப்பாடலை ஆண்டாளுக்குச் சமர்ப்பிக்கறேன்..ஒரு பெண் இப்படி எழுதலாமா..? பெண் அங்கமான முலை குறித்து?  ஐயோ இது பெண்ணிய கட்டமைப்புக்கு அடுக்குமா கடுக்குமா என்றெல்லாம் இல்லாமல் மனதில் உள்ளதை உள்ளபடி, ஆண்டவனிடம் எந்த விதப் பாசாங்கும் இன்றிச் சொல்கின்றாள் தன் காதலை..:) 

"பெண்ணோடு தோன்றி பெண்ணோடு பெண்ணோடு வாழ்ந்தும் பெண் மனது என்னவென்று புரியவில்லையோ .."

இப்ப ஏன் திடீர்னு இந்தப் பாட்டுன்னா..சுவரில் புராணனின் பெயரெழுதி..ங்கற வாக்கியம் படிக்கவும்தான்.. வீட்டுல குட்டீஸ் தான் கிறுக்குவாங்க..ஆனா இங்க குமரி கிறுக்குகிறாள்..யார் பெயரை..? கண்ணன் பெயரையா காமன் பெயரையா..இரண்டுமே வர்ற மாதிரி இருக்கு வாக்கிய அமைப்பு...புராணனின் பெயர் என்றால் கண்ணன் பெயர் என்றே பொருள்படும்..புராண  நின்பெயரழுதின்னு தனியா வாசிச்சு பின்னால் காமதேவா என அழைக்கிறதையும் சேர்த்து வச்சுப்பார்த்தா காமனை சொல்லுவது போலத் தோன்றும் :) இந்தப் பெண் கள்ளச்சியப்பா...காமனைப் புகழ்வது போல் தன் தலைவனையும் எண்ணி மகிழ்ந்து கொள்கின்றாள். :) 
சுறவநற்கொடிகளும் - மீன் கொடித் தேர் மன்மதனுக்கு உரியது  ..மீன் கொடித் தேரில் மன்மதராஜன் ஊர்வலம் போகின்றான்.. திரைப் பாட்டு நினைவுக்கு வருதுல்ல .மீன் கொடிகளும் குதிரைகளும் ,கவரி கொண்டு செய்த சாமரம் வீசும் பெண்களும் கரும்பு வில்லும் உனக்கே தந்தேன்..
இப்பாடலுக்காகப் பொருள் தேடிய பொழுது,  இதிலே சுவராசியமான தகவல் கிட்டியது..கவரி மான் என்ற ஒன்றே இல்லையாம்..கவரி மா (எருமை -Yak ) யாம்..பனி மலையில் வாழும் அந்த எருமைக்கு அதன் கவரி -மயிர் ) மட்டுமே பாதுகாப்பு..அது இல்லை எனில் அது குளிர்தாங்காமல் இறந்திடும்..மானுக்கு அதன் தோலே பாதுகாப்பான ஒன்றுதானாம்..மானாக இருக்குமோ என்றெண்ணி இணையத்தில் தேடினால் கஸ்தூரி மான் தான் காட்டுது கவரி மான் இல்லை..ஆனா திருக்குறள் (மயிர் நீப்பின் வாழாக் கவரி மா ) ஆங்கில விளக்கத்தில் தெளிவாக yak என்றே குறிப்பிட்டு இருக்காங்க..காட்டெருமை..
கவரி எருமை என்றால் சற்றே ஏளனமா இருக்குமுன்னு கவரி மான் ன்னு வச்சுட்டாங்களா..ஒருவேளை யாராவது கவரி மான் இதுதான் ,நாங்க பார்த்தோம்ன்னு வந்தீகன்னா இதை நான் மாத்திக்கறேன் :) ஏன்னா இது கவரி மானா ,கவரி எருமையான்னு கண்டுபிடிக்க நிறைய நேரம் செலவு செய்திருக்கிறேன் :) தமிழறிந்த நண்பரிடம் ஏகப்பட்ட குறுக்குக் கேள்விகள் :) 

இதன் உரோமங்கள் அவ்வளவு மென்மை போல..அதான் அதுல சாமரம் செய்திருக்காங்க..ஒரு பாடலில் எவ்வளவு செய்திகள் நமக்கு..பிணா என்றால் பெண்..(பெண் விலங்குகளுக்கு அதன் ஆண் இணை அளவுக்கு முடிகள் இருப்பதில்லை..மயில் ,சேவல் உட்பட ) சாமரம் வீசும் பெண்களோடு மீன்கொடித் தேரில் மன்மதராஜன் கரும்பு வில்லோடு போகிறாராம் :)

சிறுவயதில் இருந்தே ஆரம்பம் முதலே,  என்றும் தனக்குரியவன் இவன்தான் தன் தலைவன் என்று நினைத்திருந்த நெஞ்சம் என்னுது..என் பெரிய முலைகள்,  துவாரகை மன்னனாகிய கண்ணனுக்கே என உறுதி அளித்து வேண்டித் தொழுதிருந்தேன்..அம்மன்னனுக்கே என்னை உரியவள் ஆக்கி விடு!

என்னதான் காமம் மீது ஈடுபாடு இருந்தாலும் பிடிக்காதவன் தொட்டா பிடிக்கிறதில்ல பெண்களுக்கு..விரும்பியவனிடம் குளிரும் நிலவுகள் ,பிடிக்காதவனிடம் சுடும் சூரியன் ஆகிவிடுவார்கள்..கோதையும் அம்மரபு வழி வந்தவள்தானே.. அதான் இப்படிச் சொல்றாங்க..:)



Saturday, 30 January 2016

3. மத்தநன் னறுமலர் முருக்கமலர்

3.மத்தநன் னறுமலர் முருக்கமலர் 

பாடல் :3

மத்தநன் னறுமலர் முருக்கமலர் 
கொண்டுமுப் போதுமுன் னடிவணங்கித் 
தத்துவ மிலியென்று நெஞ்செரிந்து 
வாசகத் தழித்துன்னை வைதிடாமே, 
கொத்தலர் பூங்கணை தொடுத்துக்கொண்டு, 
கோவிந்தா னென்பதோர் பேரெழுதி 
வித்தகன் வேங்கட வாணனென்னும் 
விளக்கினிற் புகவென்னை விதிக்கிற்றியே..!

விளக்கம் :மத்த நன்னறு மலர் - நறுமணம் கொண்ட ஊமத்த மலர்
முருக்க மலர் கொண்டு - முருங்கை மலர் கொண்டு (கல்யாண முருங்கைப் பூ )
முப்போதும் முன்னடி வணங்கித் - மூன்று பொழுதுகளும் உன் அடி தொழுது
தத்துவம் இலி என்று - உண்மை இல்லாதவன் என்று
நெஞ்சு எரிந்து - மனம் வெந்து
வாசகத்தழித்து உன்னை - நீ சொன்ன சொல் காப்பாற்றுபவன் என்ற எண்ணத்தை நெஞ்சத்தில் இருந்து அகற்றி
வைதிடாமே - உன்னை திட்டிவிடுவதற்குள்
கொத்து அலர் பூங்கணை - மலர்க்கொத்து கொண்டுஅம்புகள் தொடுத்து
கோவிந்தன்  என்பதோர் பேர் எழுதி - கோவிந்தன் என அதிலே பெயரெழுதி
வித்தகன் - பல வித்தைகள் கற்றவன்
வேங்கட வாணன் என்னும்- வேங்கடவன் என்னும் பெயர் பெற்ற
விளக்கினிற் புக என்னை - விளக்கினில் (என் வாழ்வுக்கு வெளிச்சம் தரும் விளக்கானவனிடம் புக என்னை
விதிக்கிற்றியே - எய்து விடேன்..

ஹா ஹா என்னவொரு அதிரடி மிரட்டல்..:)  முதல் இரண்டு பாட்டிலும் ரொம்ப பணிந்து , எங்களைச் சேர்த்திடு எனக் கெஞ்சும் பெண் இதிலே காமனை மிஞ்சி மிரட்டுகிறாள்..பொதுவாக நான் அறிந்தவரையில் ஊமத்த மலர்கள் பூஜைக்குப் பயன்படுவதில்லை..ஆனா ஆண்டாள்தான் கிராமத்துப் பெண்ணாச்சே..அங்கே எளிதாகக் கிடைப்பது இந்த ஊமத்த மலர்கள் தாம்..(சிறுவயதில் ஊமத்தங்காய் அரைச்சுக் கரும்பலகைக்கு இன்னும் கருப்பு சேர்க்கப் பயன்படுத்தியது நினைவுக்கு வருகிறது :) )

"கோவிலில் தேவிக்குப் பூசை 
அதில் ஊமத்தம்பூவுக்கேன் ஆசை " என்று திரைப்பாடல் வரி நினைவுக்கு வருகிறது .
எங்கயோ ஆத்து,  குளத்து மேட்டுல இருக்கிற பூவு ,  சாமி பூசைக்கு ஆசைப் படலாமா..படலாம் செய்பவள் ஆண்டாளாக இருந்தால்..அவள் பேதம் பார்ப்பதில்லை.. :)

ஊமத்தம்பூ 

ஆனா ஆண்டாள் இந்த ஊமத்த மலர் நல்ல வாசனையானதுங்கறாங்க..அந்த ஊமத்த மலரையும்  , கல்யாண முருங்கைப் பூவையும் காமனுக்குப் படைக்கிறாங்களாம்

கல்யாண முருங்கை 

எங்கயாவது இது நடக்குமா அடுக்குமா? ..நடக்கும்.. மகா பாரதத்திலேயே ஒரு கதை கேள்விப்பட்டிருக்கிறேன்.  கண்ணனுக்கு அவரைப் பார்த்த மகிழ்விலும் நெகிழ்விலும் பழத்தை உரிச்சுக் கொடுக்கும் அவரது பக்தை ,பழத்தைத் தருவதற்குப் பதில் தோலைக் கொடுத்திட்டு இருந்தாங்களாம்..இவரும் எதுவும் சொல்லாமல் வாங்கி உள்ளே அமுக்கிக் கொண்டிருந்திருக்கிறார்..சிறிது நேரம் கழித்தே சுயநினைவு வந்து பதறி எப்பேர்ப்பட்ட தவறு இழைத்து விட்டோம் என வருந்தியபோது, கடவுள் அவங்களை ஆசுவாசப்படுத்தி உமது பக்தியே பிரதானம் , இப்பற்றோடு உன் கையால் எது கொடுத்தாலும் அதை நான் உண்பேன் என்றாராம் கண்ணன்.. தன் கண்ணைத் தர,  சிவனின் மீது கால் வைத்து கண்ணைப் பிடுங்கி வைத்த கண்ணப்ப நாயனார் கதையும் படித்திருக்கிறோம் தானே.. ஆண்டாள் செய்தால் மட்டும் பிழையாகி விடுமா என்ன.. ?:) பழையதைக் கூட படைக்கலாம் பக்தியோடு..ஆண்டவன் மறுப்பதில்லை..

அப்படித் தனக்குக் கிடைத்த மலர்களைக் கொண்டு, மூன்று பொழுதுகளும் அவன் திருவடி வணங்கித் தொழுவதவளையே  , இவன் பொய்யானவன் சொன்ன சொல் தவறியவன் ,நாம் நினைத்ததை நடத்திக் கொடுப்பான் என்ற நம்பிக்கையைச் சிதைத்தவன் என்றெல்லாம் நான் நெஞ்செரிந்து (என் வயிறெரிஞ்சு சொல்றேன் நீ விளங்க மாட்டே என்பதன் நாகரிக வடிவம் தான்  ஆண்டாள் சொல்வது :)) ) நான் உன்னை திட்டி விடும் முன்னம் என் நம்பிக்கையை நிறைவேற்றி விடு என்று மிரட்டுறாங்க..என்னடா மூனாவது பாட்டிலேயேவா என மிரளாதீங்க இது வெறும் trailer தான் main picture லாம் இனிமேல் தான் இருக்கு..:))


மலர்க்கணைகள் தொடுக்கச் சொல்றாங்க..பின்ன வேற ஏதாவது கடினமா செஞ்சு அது அவள் நாயகனுக்குப் பாதகம் ஆகி விடக்கூடாது இல்லையா..
மலரம்புகள் செய்து அதிலே கோவிந்தன் பெயரெழுதி , பல வித்தைகள் கற்றவன் ,வேங்கடவன் என்பவனின் என் வாழ்வுக்கு வெளிச்சம் தரும் விளக்கானவனிடம் தஞ்சம் புக என்னைச் சேர்த்து விடேன்..

பாருங்களேன்..ஆண்டாள் பூஜைகள் எவ்வளவு எளிதாக இருக்கு.. கோலம் போடுறாங்க ,   சுள்ளி பொறுக்கித் தீ வளர்க்கிறாங்க ,  இப்ப ஊமத்தம் மலர் , கல்யாண முருங்கை மலர் பூ போடுறாங்க..

தன்னிடம் என்ன இருக்கோ ,தன் சக்திக்கு எது முடியுமோ அதைக் கொண்டே செய்வதே தெய்வ வழிபாடு.. என்ன.. தெளிந்ததா ?:)


2.வெள்ளை நுண் மணற்கொண்டு...

2. வெள்ளை நுண் மணற்கொண்டு...

பாடல் :2
வெள்ளை நுண் மணற்கொண்டு தெருவணிந்து
வெள்வரைப் பதன்முன்னம் துறைபடிந்து
முள்ளுமில் லாச்சுள்ளி யெரிமடுத்து
முயன்றுன்னை நோற்கின்றேன் காமதேவா,
கள்ளவிழ் பூங்கணை தொடுத்துக்கொண்டு
கடல்வண்ண னென்பதோர் பேரெழுதி,
புள்ளினை வாய்பிளந் தானென்பதோர்
இலக்கினிற் புகவென்னை யெய்கிற்றியே.

விளக்கம் :
வெள்ளை நுண் மணல் கொண்டு  - வெள்ளை நிறக் கோலப்பொடி கொண்டு
வெள்வரைப் பதன் முன்னம் - வெள்ளென வெளிச்சம் வருவதற்கு முன்பே
துறைபடிந்து - குளத்தில் இருக்கும் படித்துறை சென்று
முள்ளுமில்லாச் சுள்ளி எரிமடுத்து -- முட்களற்ற மரக் குச்சிகள் எடுத்து
முயன்று உன்னை - முயன்று உன்னை
நோற்கின்றேன் காம தேவா - நோன்பு இருக்கிறேன் காமதேவா
கள் அவிழ் - தேன் வடியும்
பூங்கணை - பூக்களால் செய்யப்பட்ட  அம்பு தொடுத்துக் கொண்டு
கடல்வண்ணன் என்பதோர் பேரெழுதி -  கடலின் நிறம் கொண்ட நீல வண்ணன் பெயரெழுதி
புள்ளினை வாய் பிளந்தான் என்பதோர் -பகாசுரன் என்ற அரக்கன் கொக்கு (புள் ) வடிவம் எடுத்து வந்தபோது அவ்வரக்கன் வாய் பிளந்தவன் மீது
இலக்கினிற் புகவென்னை - இலக்கு வைத்து என்னை அவன் மேல்
யெய்கிற்றியே. - எய்து  விடேன்
Add caption
வெள்ளை நுண்மணல் கொண்டு என்பது வேறொன்றும் இல்லை வெள்ளைக் கோலப்பொடி தான்..எவ்வளவுக்கு எவ்வளவு அது நுண்ணிய மணலாக இருக்கோ அவ்வளவுக்கு அவ்வளவு கோலம் போட இலகுவாக இருக்கும்..கோலமும் அழகா வரும்.. அது வச்சு அழகா கோலம் போடுறப்ப தெருவுக்கே ஓர் அழகு வந்துடும்.
நன்றி :கூகுல் 

அதைத் தான் தெருவணிந்து என்கிறார் முதலிரண்டு பாடல்களிலும்.. தெருவுக்கு அழகான கோலத்தை அணிவித்தல்..வெளிச்சம்  வரும் முன்னம் வெள்ளெனக் குளிச்சு அதுவும் எங்க..? அக்காலத்தில் குளத்தில் குளிப்பது வழக்கம்..குளத்தின் படிகளை படித்துறை என்பது வழக்கம்..அங்கே சென்று குளிச்சுட்டு , முட்களற்ற சுள்ளி ... இன்னமும் சுள்ளி பொறுக்குதல் கிராமத்தில் வழக்கில் உள்ள பேச்சு..அப்படியான சுள்ளிகள் (மரத்தில் இருந்து விழுந்து இருக்கும் சின்னச் சின்ன உடைந்த  குச்சிகள் எடுத்து எரிச்சு தீ வளர்த்து வேள்வி செய்து,  காமதேவா உன்னை நோற்கின்றேன்..(நோன்பு இருத்தல் ) வேள்விகள் எப்பெண்ணாவது செய்வாளா..ஆனால் கோதை செய்கிறாள்..கண்ணனைச் சேர எதையும் செய்யத் துணிகிறாள்.. )
தேன் வடியும் பூக்களால் செய்யப்பட்ட கணைகள் கொண்டு ,தொடுத்து ,அதில் கடல் வண்ணம் கொண்ட நீல வண்ணனின் பெயர் எழுதி ,

கொக்கு வடிவில் வந்த அரக்கனின் வாய் பிளந்தவன் மார்பினை,  இலக்காகக் கொண்டு அடையுமாறு அதிலே என்னையும் வைத்து எய்து விடேன்..
எப்ப்ப்ப்பூடி ...ஆண்டாள் ஆசைப்பட்ட மாதிரி பேர் எழுதியாச்சு :))
இதை படிக்கும் போதே ஒரு சன்னமான குரல் கொண்டு படிச்சுப் பாருங்களேன்..
இப்படி ஓர் ஏக்கமான பாவனை கண் முன் எழும் :) இந்தப் பாடல் படிக்கிறப்ப
காதல் ஓவியம் என்ற திரைப்பாட்டில் ,
"தாங்குமோ என் தேகமே..
மன்மதனின் மலர்க்கணைகள் தோள்களிலே..வரிகள் நினைவுக்கு வந்தது..காமன் அம்புகள் அவ்வளவு சக்தி வாய்ந்தவை என்பதால்தான் கோதை காமனிடம் முறையிடுகிறாள் :) 

Thursday, 28 January 2016

1. தையொரு திங்களும் !


ஆண்டாள் திருவடிகளே போற்றி !!!
வணக்கம்..எனக்கு இது புது களம்.. இது போன்றவற்றிற்கு உரை எழுதுவது கத்தி மேல் நடப்பது போல. மிகப்பெரிய சவாலும் கூட..ஓர் ஆண்டு காலமாக ஆண்டாளுக்கும் எனக்குமான மானசீக பந்தம் , என்னைப் போன்றவள் என்ற உரிமை , பெண் மீதான இன்றைய கட்டமைப்புகளில் வாழாத , பெண்ணுக்குரிய உண்மையான உணர்வோடு வாழ்ந்தவள் என்ற மதிப்பு இவற்றால் ஆனது.. அவள் சார்ந்த கேள்விகள் எழ எழ,  எனக்கு ஏதேனும் ஒரு வடிவில் பதில் கிடைக்கும் ..அது இன்னும் ஆர்வத்தைத் தூண்டியது..ஓங்கி உயர்ந்த செந்நெல் ஊடு கயலுகள எனப் படித்த பொழுது, அது எப்படி நெற்பயிரின் ஊடே எங்கோ ஆற்றிலோ,குளத்திலோ உள்ள மீன்கள் இங்கே வந்து புகும் என்ற கேள்வி வந்தது..பிறகு ஒரு மாதம் கழித்து ,இணையத்தில் இந்தோனேசியாவில் இப்படி விவசாயம் செய்கிறார்கள் என்பது படத்தோடு கிடைத்த பொழுது மலைத்து விட்டேன். :))ஆண்டாள் வேளாண் விஞ்ஞானி


இது போலவே வெள்ளி எழுந்து வியாழம் உறங்கிற்று என்ற வரிகள் படிக்கவும் வாரத்தில் வியாழனுக்கு அடுத்து தானே வெள்ளி வரும் அதைச் சொல்றாங்க போல என்றே நினைத்திருந்தேன் ..பிறகு தான் அறிந்தேன்..அவள் வானில் உள்ள கோள்களில் நிகழ்ந்த மாற்றத்தைக் குறித்து இருக்கிறாள் என்று..ஆண்டாள் வானியல் அறிந்தவள்..இவ்வளவு அறிவான பெண்ணின் துறுதுறுப்பு ஈர்த்தே பெரியாழ்வார் அவளைத் தத்து எடுத்து வளர்த்திருக்க வேண்டும் . இப்படி அறிவான மானிடர்களை எல்லாம் அவதாரம் ஆக்கி,  தங்கள் சாதி எனக் காட்டிச் சொன்ன கதைகளை எல்லாம் இனியும் நான் நம்பப் போவதில்லை..புராணங்களைப் பேசுபவர்களிடம் குறுக்குக் கேள்வி கேட்டுப்பாருங்கள் சரியான பதில் வராது .வேண்டுமெனில் நம்மைப் பற்றிய குற்றச்சாட்டு வரக் கூடும் :) 

அறிவான பெண் எனினும் மனம் குழந்தைத்தனமானது..  கண்ணன் (மாயோன் என்ற முல்லை நிலத்துத் தமிழ்க் கடவுளே கண்ணன். ஆனால் அது இன்று கிருஷ்ணனுக்கே என்றாகி விட்டதால் கண்ணன் என்றே சொல்லுவோம் )   மீது அவளது தீராக் காதலைப் படிக்கும் போதே உணர முடியும்..இராமானுசரே ,சற்றேனும் பெண் தன்மை கொண்டவனே ஆண்டாளை முழுமையாகப் புரிய முடியும் என்றாராம்.. ஆண்டாள் என்றாலே திருப்பாவை என்றதோடு பலரும் நின்று விடுகிறார்கள்..முப்பது பாடல்கள் முடிந்ததும் , ஆண்டாள் அரங்கனோடு கலந்து விட்டதாக நம்புகிறார்கள்..
இல்லை அதன் பின்பும் வராத கண்ணனைச் சேர , காமனிடம் வேண்டுதல் ,  கண்ணனுக்கு அவள் விடும் மேக தூது, குயில் தூது , அழகருக்குப் பாடிய பாடல்கள் பிரிவாற்றாமை, திருமணக் கனவு , சேர முடியாத வேட்கை , வேதனை, பிருந்தாவனம் சென்று அங்கே கண்ணனைத் தேடி அடியவர்கள் சொல்லும் பதிலிலியே ,  இறுதியில் அப்படியே அமைந்து  போய்  முடிப்பதே நாச்சியார் திருமொழி.. ஒரு பெண்ணின் மனவுணர்வுகளை அப்பட்டமாக வெளிப்படுத்தியதை ஏற்றுக்கொள்ள  முடியாமல் இது மறைக்கப்பட்டதோ என்னவோ..:( ..

நாச்சியார் திருமொழி தனிப் புத்தகமாகக் கிடைக்கும் என மதுரையில் தேடினேன்.. வில்லிபுத்தூரிலும் கூட திருப்பாவை கிடைத்ததே அன்றி நாச்சியார் திருமொழி என்றால் என்னவெனத் தெரியாமல் ,  திருதிருவென விழிக்கிறார்கள்.. அவள் வாழ்ந்த இடத்திலேயே அவள் வரலாறு இல்லை..:((  பின்னர் இது பிரபந்தத்தில் ஊடேயே இருக்குமே என்றார் நண்பர்.
ஏதோ ஓர் நாள் கனவில் அப்பா வாங்கி வைத்திருக்கும் பிரபந்தத்தைப் பார் என்று எவரோ நினைவூட்டுவது போல இருக்க  , அப்பா வாங்கி வைத்திருந்த பிரபந்தத்தில் ,இதை மட்டும் ஒரே மூச்சில் படித்து முடித்தேன்.. பின்னரே இதற்கு உரை எழுத வேண்டும் என்ற எண்ணம் எழுந்தது.  இயன்றவரை, இணையத்தில் தேடியும், தமிழறிந்த நண்பர்களிடம் ஐயம் தெளிந்தும் இங்கே பதிவு செய்கின்றேன்..எத்தனை நாளில் முடிப்பேன் என்ற கணக்கு எடுத்துக் கொள்ள வில்லை..எப்பப்ப முடியுதோ அப்பப்ப எழுதுவோம் :) இதை ஏதோ ஒரு மதம் சார்ந்த பாடல்கள் என்று புறக்கணிக்காமல் ,தலைவி , தலைவன் மீது கொண்ட காதல்,பிரிவாற்றாமை கொண்டு அரற்றுவதாக எண்ணிப் படியுங்கள் அந்தப் பார்வையில்  மட்டுமே இதை முழுக்க முழுக்க எழுதவிருக்கிறேன் .
குறிப்பு : இவ்விளக்கவுரைகளில் பயன்படுத்தப்பட்டுள்ள படங்கள் யாவும், இணையத்திலிருந்து எடுக்கப்பட்டவை. அவை அவற்றை வரைந்த,புகைப்படம் எடுத்தவரையே சாரும்..

1: தையொரு திங்கள்
பாடல் :1
தையொரு திங்களும் தரைவிளக்கித் 
தண்மண் டலமிட்டு மாசிமுன்னாள்,
ஐயநுண் மணற்கொண்டு தெருவணிந்து 
அழகினுக் கலங்கரித் தனங்கதேவா,
உய்யவு மாங்கொலோ வென்றுசொல்லி 
உன்னையு மும்பியை யும்தொழுதேன்,
வெய்யதோர் தழலுமிழ் சக்கரக்கை 
வேங்கட வற்கென்னை விதிக்கிற்றியே..

தையொரு திங்களும்  -   தை மாதம் முழுவதும்
தரை விளக்கித் - தரையைத் தூய்மைப்படுத்தி
தண் மண் தலம் இட்டு - குளிர்ந்த நீர் தெளித்த மண் தரையில் இட்டு
மாசி முன்னாள் - மாசி முதல் நாள்
ஐய நுண் மணற்கொண்டு - அழகிய நுண்ணிய மணல் கொண்டு (கோலம் )
தெரு அணிந்து அழகினுக்கு அலங்கரித்து -  தெருவில் இட்டு அழகாய் அலங்கரித்து
அனங்க தேவா - காம தேவா
உய்யவு மாங்கொலோ என்று சொல்லி  - உன்னைத் தொழுவதால்
உய்யலாமோஎன்று எண்ணி - இந்த துன்பத்திலிருந்து தப்பிக்கலாமோ என்று எண்ணி
உன்னையும் உம்பியையும்  தொழுதேன் -உன்னையும் உன் தம்பியான சாமனையும் தொழுதேன்
வெய்யதோர் தழலுமிழ் - வெப்பமுடைய தழலை (நெருப்பை ) உமிழும்
சக்கரக்கை வேங்கடவற்கு என்னை  - சக்கரத்தைக் கையில் கொண்ட வேங்கடவனுக்கே என்னை
விதிக்கற்றியே -  விதித்து விடேன்..(அவனுக்கே உரியவள் என்றாக்கி விடேன் )

விளக்கம் : 
மார்கழி முழுக்க நோன்பு இருந்தும், இந்தக் கண்ணன் அவளை வந்து சேரல..ஒருவேளை காமனைத் தொழுதா வந்து சேருவாரோன்னு ஒரு நப்பாசை..(இன்றும் , தாடிக்கொம்பு என்ற ஊரில் உள்ள சௌந்தரராஜ பெருமாள் கோவில் வாரா வாரம் வியாழன் ரதி-மன்மதன் பூஜையே நடக்குது கல்யாணம் ஆகாதவங்களுக்கு ஆக ) அதனால் காமனைத் தொழ முடிவெடுத்துப் பாடல் பாடுகிறாள்..(அனங்க தேவா என்றால் உடல் அற்றவன் என்று பொருளாம்..ஒருமுறை சிவனால் எரிக்கப்பட்ட காமன் உடம்பு அற்றுப் போனதாக புராணம் .  )
தை மாதம் ..(திங்கள் என்பது அருமையான சொல்..ஆனா அதைக் கிழமைக்கு மட்டுமே பயன்படுத்துகிறோம்..) முழுவதும் தரையைத் தூய்மைப்படுத்தி , குளிர்ந்த நீர் தெளித்த மண் தரையில் (இதிலே மண்டலம் என்பது மண்டல பூஜையாக இருக்குமோ என்ற ஐயம் இருந்தது..ஆனால் ஒரு மண்டலம் என்பது 48 நாள் ..தை மாதம் 48 நாள் இல்ல ..மாசி முதல் நாளே நோன்பு முடிக்கிறாங்க எனவே இது அந்த மண்டலமாக இருக்க வாய்ப்பிராது என அப்பொருளை ஒதுக்குகிறேன்..மண் தலம் (தலம் என்பது இடம் ,கோவில் ,வீடு என்ற பொருள்படும்  ..அக்காலத்தில் எல்லாம் மண் தரை தான் ) அழகிய நுண்ணிய மணல் கொண்டு (கோலப்பொடி ) தெருவில் இட்டு அலங்கரித்து வைக்கிறாங்களாம்.. (கோலம் வரையப்பட்ட தெருக்களின் அழகே தனி! )
நன்றி :சொரூபா 

அந்தக் காம தேவனிடம் இதைச் சொல்லி ,இப்படி உன்னைத் தொழுதலாவது நான் உய்ய (இந்த மோசமான நிலையில் இருந்து நன்னிலை அடைய ) வழி கிடைக்குமோ என்றெண்ணி உன்னையும் உன் தம்பி சாமனையும் தொழுதேன். வெப்பம் கொண்ட தழல் (நெருப்பு ) உமிழும் சக்கரத்தைக் கொண்டவனாகிய வேங்கடவனுக்கே என்னை விதித்து விடச் செய்யேன் (அவனுக்கே உரியவள் என்றாக்கி விடேன் ) என்று இறைஞ்சுகிறாள் கோதை.